Molia se Alii Faasalalau ua Tuuaia i ni Lafoga ua Ta’uleagaina ai le Taitai ma nisi o Sui o le Malo
Ua faamaonia mai e leoleo se moliaga e faasaga i se alii faasalalau na malaga mai Ausetalia mo le fonotaga faaletausaga a le Ekalesia Metotisi. O loo tuuaia i le lalafo o ni faamatalaga taufaaleaga agai i le Taitai o le Malo, faapea nisi sui o le Malo, e tusa ai ma se tagi sa faauluina e le failautusi a le FAST.
O Tiumalumatua Lemalu Maifea Fetu, o se tasi o loo faafoeina se polokalame ua faaigoaina, Samoa Toe Faaolaola i Ausetalia.
Sa faamaonia mai e le Komesina o Leoleo, Auapaau Logoitino Filipo, e tasi le moliaga faasaga ia Tiumalumatua, o le faia lea o faamatalaga e ono aafia ai se reputation pe aafia ai le tulaga ta’uleleia o se tagata.
I lalo o le tulafono a Samoa (s117A Crimes Act) e solitulafono le lafoina o upu poo le faia lea o ni tuuaiga e lē sa’o agai i se isi tagata, e ono aafia ai lona ta’uleleia.
Saunoa le Komesina o Leoleo, e iai nisi o video clips faatoa taunuu atu i le ofisa, ma o loo faagasolo iai susuega a le matagaluega pe iai nisi moliaga faaopopo e ono tulai mai.
Sa toe tatala i tua Tiumalu i le Aso Toanai lava lea na molia ai (on bail). O le Aso 2 o Aukuso 2022 e uluai tulai ai i luma o le Faamasinoga (first mention).
Sa faatonuina e le Resitara o Faamasinoga le taofia ai o lona tusi folau, faapea aiaiga o le saini i le Ofisa o Leoleo i Faleolo i faaiuga o vaiaso taitasi.
Sa tā’ua foi e Auapaau, ua ma’ea ona tuuina atu se talosaga i le ofisa o le Loia Sili, e taofia ai pea lē ua tuuaia, seia ma’ea ona tali atu i ona moliaga.
O le tagi sa faauluina i le ofisa o leoleo, sa tuuina atu e le failautusi a le Faatuatua i Le Atua Samoa ua Tasi (FAST).
O loo tuuaia Tiumalumatua e faapea sa ia faia ni lafoga ma ni faamatalaga i luga o le polokalame faasalalau, Samoa Toe Faaolaola e tuua’ia ai le tamaitai palemia ia Fiame Naomi Mataafa, faapea lona faia o ni faamatalaga e faaleaga ai nisi o Minisita o le Kapeneta.
O le tulafono lava lea e tasi sa taofia ai foi e leoleo le alii lauiloa o King Faipopo poo Malele Paulo, ina ua ia lafoina ni tuuaiga agai le Taitai o le Malo i lenā taimi, le Susuga ia Tuilaepa Sailele Malielegaoi.
Sa molia e leoleo Malele Paulo ia Fepuari o le 2019 ina ua malaga i Samoa mo le maliu o lona tinā. I le maea ai o le Faamasinoga ia Oketopa 2019; na tuuina mai ai se faasalaga e fitu vaiaso i le toese mo Malele Paulo.
(6)
