Molia faatasi se Tamā ma lona Atalii i le Umia o le Aisa

0
32

Sa tulai faatasi i luma o le Faamasinoga Maualuga se tamā ma sona atalii e faasaga i moliaga o le umia o fualaau faasaina i le ituaiga o le aisa (methamphetamine).

O Tupai Anthony Monanu, ma lona atalii e na o le 17 tausaga ia Benjamin Junior Tupai, na tulai i luma o lana afioga i le Faamasino ia Fepuleai Ameperosa Roma i le taeao o le Aso Lua.

O i la’ua nei na taofia mai e leoleo i se osofaiga a le Matagaluega sa faia i Falelauniu i le lua vaiaso talu ai.

E le’i tuuina mai sa la’ua tali i luma le Faamasinoga, ona sa talosaga le itu a leoleo mo se taimi faaopopo sei faamaea ai suesuega ma faamautu mai moliaga.

Sa faaulu se talosaga a le tamaitai loia ia Leinafo Tamalelagi Strickland, o loo tulai mo ë ua molia, ina ia tatala i tua e tālia ai taualumaga o le Faamasinoga.

Sa mafai ona tatala i tua le talavou ia Benjamin Junior Tupai i lalo o tuutu’uga;

* tuuina mai totonu pepa malaga

* nofo mau i ona aiga i Vaimoso

* saini i le ofisa o leoleo i Apia i Aso Lulu o vaiaso taitasi

* ma ia aua nei toe molia mai lava i se isi soligatulafono

Ae mo le tamā ia Tupai Anthony Monanu, o le a fa’aauau pea ona taofia i lalo o le vaavaiga a leoleo, seia tālia ai le aso ua atofa e toe fofogaina ai lenei mataupu.