Molia e leoleo se tamaitai ua tuuaia lona aveesea o le $80,000 tala mai se faletupe na galue ai
Ua molia e leoleo se tamaitai i le gaoi ao avea ma tagata faigaluega.
I le feiloaiga masani a ofisa faasalalau ma le Matagaluega o Leoleo mo lenei vaiaso na faamaonia mai ai e le Sui Komesina o Leoleo le susuga Papalii Monalisa Tiai-Keti lenei mataupu.
O lē ua molia o se tamaitai 38 tausaga mai Satoalepai ma Nuu Fou. O loo feagai nei o ia ma moliaga o le gaoi a’o avea ma tagata faigaluega (theft as a servant).
Saunoa Papalii, o lenei tamaitai e faigaluega i le faletupe o le ANZ Bank i Apia.
Na lipotia e le faletupe le mataupu i le matagaluega ma faasolo ai loa suesuega a leoleo.
Saunoa le Sui Komesina, o suesuega a leoleo ua faamaonia ai se tino i tupe e $80,000 tala na ia to’esea.
O loo tatala I tua lenei tamaitai i lalo o aiaiga e saini i le ofisa o leoleo I Aso Lulu o vaiaso taitasi a o tālia le Aso 12 o Tesema e tulai ai i luma o le faamasinoga e tali atu i ona moliaga.
O le faletupe o le ANZ Bank ua loa tausaga o tautuaina Samoa talu mai ona faatuina i le 1990 ao faaigoaina o le Bank of Western Samoa. O le ANZ e maitauina le tele o lana fesoasoani i tausaga taitasi mo le Faalapotopotoga o le Kanesa i Samoa faapea isi faalapotopotoga tumaoti.
(8)
