E 41 tausaga o se tama mai le afioaga o Sapapalii ua molia e leoleo i le umiaina o fualaau faasaina faapea se paipa poo se mea faitino, atoa ai ma se aupega poo se pulufana.
Saunoa le Sui Komesina o Leoleo, Papalii Monalisa Tiai-Keti, o se valaau na lipoti atu i le ofisa o leoleo i Tuasivi. Na tali atu le matagaluega, ma maua atu ai lea tama ma lana taavale i le taulaga i Salelologa.
Ina ua avatu lenei tama i le ofisa i Tuasivi ma sailia totonu o lana taavale, sa maua ai ni afiafi mariuana e 8, faapea ni fatu mariuana e 10.
“Sa iai foi se paipa e faa’aoga e ulaina ai le aisa (utensils) ma se ututau e tasi o le laau malosi o le ituaiga o le 12 (12 gauge), faapea se tino i tupe e $1,250.
O le Aso 6 o Fepuari o le tausaga nei o le a tulai ai i luma o le Faamasinoga lea tama e tali atu i ona moliaga.
Taúa e le Sui Komsesina, e le o malolo le matagaluega i le faatinoga o le latou tiute o le taumafai lea e tafi esea faiga faasolitulafono e ala i le umiaina lea o fualaau faasaina.
