Molia alii talavou e toalua o loo tuuaia i le gaoiina o le pusa tupe mai se faleoloa i Moamoa

0
1833

Ua taofia nei e leoleo ni alii talavou se toalua o loo masalomia sa la gaoia se pusa tupe mai se tasi o faleoloa i Moamoa.

O se ata video (security video) na faaalia i luga o upega tafa’ilagi – sa iloa atu ai le feosofi mai o ni alii se toalua i totonu o le faleoloa, ma la siia i fafo le pusa tupe.

Sa la ufiufi o la foliga i ni mask, ma na iloa atu fo’i i lea ata video, le uumia o se naifi e le tasi alii. Sa faataitaio le faatau oloa ma sola i tua, ae sii loa e le tasi alii le pusa tupe ma sosola ai loa.

Ata mai le security video a le faleoloa.

Saunoa le Komesina o Leoleo, le afioga ia Auapaau Logoitino Filipo, o Junior Aumua, 20 tausaga mai Leone, ma Faafetai Uati, 18 tausaga mai Moamoa, lea ua taofia nei e leoleo.

Saunoa Auapaau, na lipotia mai loa le faalavelave, ona faapena fo’i  lea ona tali atu le Matagaluega ma amata suesuega.

O le fesoasoani mai le atunuu faapea foi sailiiliga a leoleo, lea na faigofie ai ona faatino le galeuga. Tā’ua e le Komesina o nisi lava o aiga i totonu o le afioaga o Moamoa na vave ai ona maua talavou nei.

O le taimi nei, o loo taofia i lalo o le vaavaiga a leoleo, e tālia ai le Aso 27 o Me 2024, e tulai ai i luma o le faamasinoga.

Ua molia uma i laua nei i le ulufale faamalosi, gaoi poo le fao mea, faapea le uumia o se aupega matautia (armed with a dangerous weapon).

I faamaumauga a leoleo e lata i le $2,000 lua afe tala se seleni sa iai i totonu o le pusa tupe na toesea mai.

Sa faafetaia e le afioga i le Komesina le feaoasoani ifo a le mamalu o le atunuu ua faafaigofie ai ona faatino le galuega a le Matagaluega.

O le tuualalo a le Komesina mo tupulaga talavou ma soo se tasi lava – ia alo ese mai le faia o gaioiga e solia ai le tulafono,.

“E leai se isi e mafai ona sao mai i le tulafono.”

Faasalalauga Faalauaitele