Ua molia nei se alii Samoa na malaga atu i galuega faavaitaimi i Ausetalia, o loo tuuaia i lona taumafai lea e faatino ni sauaga tau feusuaiga.
O se alii talavou na malaga atu i Ausetalia mo le fā tausaga i galuega faavaitaimi, na tulai i luma o le Faamasinoga i Ipswich Queensland e tali atu i ona moliaga o le taumafai lea e faatino sauaga tau feusuaiga (sexual assault).
O se tamaitai talavou 20 tausaga i Springfield, o loo tuuaia na toso ia i tua o se pa laau e lē ua molia ma taumafai ai e faatino le sauaga.
O le faamatalaga na tuuina mai i le lipoti a leoleo, o le leotele o le tamaitai na mafai ai ona fesoasoani ifo nisi sa latalata ane i le nofoaga sa tulai mai ai le faalavelave.
O loo taofia e le faamasinoga le faasalalauina o le suafa o lea alii atoa ai ma le tamaitai na aafia.
Na fesiligia se tasi o sui o le Ofisa o loo gafa ma tulaga o galuega faavaitaimi. E lē o manao e faailoa lona suafa ae sa faapea mai, “O se tulaga lē manuia ma le matagā ua alia’e mai nei, ma ua aafia ai le tulaga ta’ulelei o isi tagata faigaluega aemaise o le aafia ai o nisi avanoa faigaluega.”
“Ua ta’uleagaina le igoa o Samoa i le vā ma isi atumotu o le Pasefika o loo galulue foi latou tagata i totonu o Ausetalia i galuega faavaitaimi.”
Na ia tā’ua foi, i faigafaavae lava ia a le Matagaluega e lē mafai ona tuu avanoa le Matagaluega i amioga faapea, ma e tatau lava ona toe faafoi mai pe afai e mā’ea taualumaga o le faamasinoga.
O le masina nei ua faamatuu atu ai i tua i afioaga ma itumalo le filiina o tagata mo galuega faavaitaimi, e faamalumalu ai le pulega a Alii ma Faipule.
“O se taumafaiga e vaoia ai le tulai mai o faafitauli faapenei.”
Ua tatala nei i tua le alii talavou i lalo o aiaiga, e talia ai le masina o Iuni o le a toe tulai ai i luma o le faamasimoga i Ausetalia.
