E tolu moliaga ua molia ai e leoleo se alii 24 tausaga le matua mai i Mulifanua ma Fogavai ina ua aafia ai se tasi o Malu o le Malo a’o faatino ona tiute i le manava ai o galuega i le afiafi o le Aso Lulu.
Saunoa Leiataua Samuelu Afamasaga, “O moliaga o le ave taavale faatamala ua oo ai le manua, leai se laisene ave taavale, ma le ave taavale mata’utia..”
Sa faailoa mai fo’i e Leiataua o loo taofia le alii leoleo i le moata gasegase i Motootua.
Saunoa Leiataua, “O loo taofia i le falemai le alii leoleo e faaauau ona togafitiga.. Ae ua molia le ave taavale, taulealea 24 tausaga o Mulifanua ma Fogavai.”
Ua agiga i luga o upega tafailagi le ata o le faalavelave o loo manino ai le taavale lanu uliuli a lē ua molia. Sa faailoa mai fo’i e Leiataua, mai suesuega a leoleo, e le’i faasua’avā le ave taavale (no alcohol).
E le o mautinoa poo le mea ua moe le avetaavale, ae sa vaaia le agai atu o le taavale mai le isi itu o le aualatele, ma so’a le alii leoleo.
O le taimi o le manava o galuega i le magafā i Lepea ao faatino tiute o le alii Malu o le Malo i luga o le aualatele, ae taia loa e le taavale lanu uliuli a lē ua molia.
O le a tulai lē ua molia i luma o le Faamasinoga i le vaiaso fou.
- Faagasolo Suesuega a Leoleo i le Maliu o se Alii i le Vili Ma’a i Alafua - August 31, 2026
- Siliga Diana Roma Sworn-In as Acting Judge of Samoa’s Supreme Court - August 12, 2026
- “Ou te lē Mana’o e Toe Aafia ai se Isi” – Lapata’iga a se Tinā na Se’etia - August 7, 2026
