Meningococall Disease | Lapataiga Taua mai le Soifua Maloloina.

0
51

E fautuaina le mamalu lautele o le atunu’u o fuafua e faimalaga atu i Niusila ma Ausetalia ina ia utagia mai lenei lapataiga taua mai le Matagaluega o le Soifua Maloloina.

Ua ripotia mai e Pulega o le Soifua Maloloina a Niusila ma Ausetalia le maualuga ai o le numera oi latou ua a’afia i le fa’ama’i o le Meningococcal aemaise lava i le itu-matu o Niusila.

O le fa’ama’i nei o le Meningococcal o se faamai pipisi, e ogaoga fo’i ona a’afiaga i le soifua maloloina ma e manaomia vave lava ona togafitia mo le puipuia.

O a Āuga o le Meningococcal?

E faigata ona iloa gofie auga o le nei fa’ama’i ona e tau foliga tutusa lava ma auga o isi gasegase. O auga nei e vave lava ona alia’e:

  • Malō le ua
  • Maualuga le fiva (38 tikeri)
  • Tau le mafai ona pupula i le malamalama
  • Lē mautonu
  • Tigā le ulu
  • Pua’i pe fa’asuati
  • Tigā maso ma so’oga o le tino

Mo tamaiti laiti ma pepe, e taua tele le mata’itu o foliga vaaia nei:

  • Fiva
  • Sesega le tino
  • E’eva ma gagase tino
  • Le maua se malologa lelei
  • Le fia inu pe susu foi i le tina
  • Fula le ulu (pito i luma le tinipoo)

E pata foi le tino ma e le’o tagata uma fo’i e a’afia i siama o le meningococcal e pata le tino. E tuai foi ona iloa le pata o le tino i nisi, ma e iloa gofie le pata o le meningococcal e umi ona loga i le tino.

O ē uma e a’afia i auga ma foliga vaaia pei ona taua i luga e tatau ona vaai vave se fomai pe faafeso’otai se falemai lata ane aemaise lava pea fiva faalau soso’o, lē maua se malologa lelei, faapalupē ma gagase tino, ma le ai lelei foi.

 O a Auala e Pipisi ai Siama o le Meningococcal?

O siama o le fa’ama’i nei e faigata ona pipisi mai leisi tagata i isi ma e le mafai foi ona ola siama i seisi vaega ese mai le tino le tagata.

O siama o le Meningococcal e pipisi i le ea e ala lea i le tale, mafatua, fogi le isu ma anuvale.

O ai e Aafia i le Fa’ama’i?

E mafai ona aafia tagata uma ae sili ona tele le avanoa e aafia ai i latou e nonofo ma latalata i sē ua i ai siama o le fa’ama’i. E a’afia i latou e nonofo i le fale e tasi e afua mai le 7 aso ao lei amata ona aliae ma faalogoina auga ma foliga vaaia a lē ua aafia.

E le gata foi i lea, ae faigofie foi ona a’afia nai fanau laiti, feololo ma tupulaga talavou. E tele foi se avanoa e a’afia ai i latou e faimalaga atu i atunu’u o loo maualuga ai le numera o ē o lo’o a’afia i le meningococcal.

O a Auala e Puipuia ai le Pipisi o le Meningococcal?

O le tausisia lelei o le tumamā o le auala sili lea ona faigofie e taofia ai le pipisi o siama o le meningococcal. Faataitaiga :

  • Fufulu mama lima i le fasimoli poo se vailaau fulu lima i taimi uma aemaise lava pea maea ona tale ma mafatua.
  • Tapuni le fofoga ma le isu ise solosolo mamā po’o pepa solo foi pea tale pe mafatua foi.
  • Mautinoa le lafoai lelei o ia pepa i le lapisi ma faamamā solosolo ise fasimoli ma le vai.
  • Fautuaina le taofia o le feinu i le ipu/fagu vai e tasi, ma faaetete le fa’aaoga e leisi tagata o sipuni ma tui faapea foi isi mea e pipi’i ai le faua po’o feanuga (tulou)