E toaono i latou ua faamaonia mai e le faiaoga o le au siisii a Samoa, le afioga ia Tuuaopepe Asiata Jerry Wallwork, o le a fai ma sui o Samoa i taaloga a Malo o le Taupulega, poo le Commonwealth, lea o le a faataunuuina i Egelani i le masina Iulai o le tausaga nei.
O le au siisii ua filifilia e toalima alii ma le tamaitasi e toatasi. E toalua e sii i le aupaga mamafa poo le supa. O loo sii ai Feagaiga Stowers ma Petelo Lautusi.
1. Feagaiga Stowers (Supa 87 plus)
2. Petelo Lautusi (Supa 109 plus)
3. Jack Opeloge (109 kg)
4. Don Opeloge (96 kg)
5. John Tafi (73 kg)
6. Nevo Ioane (67 kg)
Saunoa Tuuaopepe, o le taamilosaga sa faatinoina lea le Aso Sa 27 Fepuari, ua faaigoaina o le Commonwealth Qualify Online, lea na filifilia mai ai i latou nei e toaono, ma e maualuga maka poo qualification marks na latou ausia lea ua faamanuiaina ai i latou.
Ta’ua foi e le susuga i le faiaoga, o le taamilosaga lea le Commonwealth, e 86 atunuu e auai ai, e ta’ifa tausaga ma faataunuuina, lea foi na faatinoina i le 2018 i le Gold Coast i Ausetalia. Sa ausia ai e le au siisii a Samoa pine auro e lua, faapea ma le lua pine siliva. O le susuga ia Sanele Mao (105 kg) ma le tamaitai ia Feagaiga Stowers (90+ kg) na pine auro, ae o Lautiti Lui ma Don Opeloge sa pine siliva.
O faanaunauga a le susuga i le alii faiaoga, ia maua le avanoa e malaga ai le au, aua e ono faamamulu nisi mai le tolauapiga pe afai e le oo ona malaga le au i Egelani.Na saunoa foi Tuuaopepe i lona faagaeetia i le maualuga o le taumafaiga i latou nei, lea faatulaga mai nisi i le faatulagana maualuga o le lalolagi poo le world ranks, le Top 3 ma le Top 2.
Na fesiligia Tuuaopepe poo iai nisi o taamilosaga e faataunuuina i lenei tausaga, ae na ia saunoa, o le Oceania Cup Online e faataunuuina i le masina nei o Mati, o le Youth Championship, ma le Junior Championship, faapea le Pacific Mini Games i le masina o Iuni, sosoo atu ai ma le Commonwealth ia Iulai.
Na ia saunoa foi o le maea ai o le taamilosaga o le Commonwealth ia Iulai, e faatoa tatala ai loa le i tua le au sii a Samoa e faimalologa tua i aiga. Saunoa Tuaopepe, sa camp mai lava le au siisii a Samoa talu mai Ianuari o le tausaga ua tea nai, 2021.
Na maua le avanoa e faatalanoa ai nisi o fetu pupula o le au siisii, le Alii talavou ia Don Opeloge, faapea ai le tamaitai ia Feagaiga Stowers. I le la’ua molimau i le latou camp mai lava ia Ianuari o le tausaga talu ai seia oo mai lava le taimi nei, “ua masani foi le tino i toleniga, aemaise foi o tulafono o le matou mafutaga e pei o meaai, o le aoina o telefoni, ma le faasa ona agai i tua mai le nofoaga… lea la ua lava tapena ai foi mo tauvaga eseese”.
Saunoa foi Tuaopepe, o le au siisii a Samoa, e fitu aso o le vaiaso e faia ai toleniga, e leai se aso e malolo ai. “E leai se mea e ta’u o le ova kolegi, o matou ia e fai lava toleniga i aso uma, ae tolu foi toleniga i le aso”. Sa ta’ua e Tuaopepe, o le vaveao i le 5-7am, sefulutasi i le tasi i le aoauli (11am – 1pm) ma le toleniga lona tolu, e faia lea i le lima agai le valu i le po (5pm – 8pm).
O saunoaga mulimuli a le susuga i le faiaoga, na ia faafetaia le Malo mo le lagolago, faapea foi le tapuaiga a le atunuu. Na ia faafetai foi nai a latou sponsor o loo lagolagoina le au siisii a Samoa.
“Ia, e tatalo atu i le tatou atunuu, tuu mai la outou faatuatuaga, o lea laa alo atu alo ma fanau mo se pine aua le tapuaiga a Samoa.
