Na faafetaia e le Alii Minisita o le Matagaluega o Fesootaiga ma Faamatalaga Televavave Faatekinolosi ia Afamasaga Rico Tupa’i, le alofa o Le Atua e le o afaina se tasi i le malaia e pei ona faatama’ia ai le Ofisa o le Pule Faatonu poo le Regulator i le aoauli analeila.
Sa faamalosiau le afioga i le Alii Minisita i le aufaigaluega, ma faamautinoa mai, o loo mautu lava back up sites a le Malo, ma saogalemu uma faila taua, mo le toe faaauauina o galuega.
“Na o le toe tatala lava o le laptop, toe open mai ma faila, ma toe faaauau loa galuega masani ia, e leai se aafiaga o galuega.”
O se faalavelave se manu e maumau ai se soifua o se isi, ma vaaia ai le mu saesae ai pei se laupepa le fale laupapa, lea sa fai ma ofisa o le matagaluega.
Sa mafai i le tautua a le fuimu ona sefe le Ofisa o le TV1 ma le latou satelite e tusa ma le $2 miliona tala o loo tu tonu lava i luma o le fale lea sa mu.
O le faateia o le aufaigaluega ma le vave o le sosolo o le mu, na lē mafai ai ona toe tapa atu i ā latou meatotino, ma le mafai ai ona aveese mai fafo o le lotoa a latou taavale.
Sa taua e le Minisita ia Afamasaga, “E o’o lava i latou ato ma ki o taavale; ia na mu uma lava i totonu”.
“Ua leai se taimi o le ofisa e tago atu au i nā mea”.
“Ae o le mea pito sili ona tāua, o le leai o se isi e afaina, ma o loo saogalemu uma le au faigaluega”.
Sa taua foi e Afamasaga, “O le malosi o le savili mai le sami, ma le aasa o le la i lenei aso, e pei o mafuaaga ia o le sosolo vave o le afi.”
Sa ia taua o upu faamafanafana sa tuuina atu i le aufaigaluega e tusa ai o lenei faalavelave, “E faapena le olaga e leai se isi e taupule ma faalavelave. Ae a tutupu mai aso faapenei, ae ua tatou tapena ma sauni mo Le Alii”.
Na taua e le Minisita, o le a tilotilo fo’i le Ofisa poo fea o le a faatino ai galuega ona o lea ua leai se fale. Na ia taua foi, o lenei fale e silafia uma o se fale ua leva.
“O se tasi o fale tuai a le Malo i aso lava lā, lea sa fai nei ma Ofisa o le Regulator, e mo’i lava la, ae leai ni faiga fou sa faia iai.”
O le tau faatusa o le fale ua faaleagaina, pe a ma le $200,000 tala, ma le pikiapu double cab e tasi a le Matagaluega sa faaleagaina. O isi taavale laiti sa i luma o le fale, o sā ia a le aufaigaluega ua lē mafai ona aveesea mai i le lotoa.
