Maualuga ma Mapu’epu’e le Au Si’isi’i a Samoa i Taumafaiga a Tuaopepe Asiata Jerry Wallwork

0
1095

Na amata tautua mai Tuaopepe, o se fai’āoga ta’iulu mo le Au Si’isi’i U’amea Mamafa a Samoa mai le tausaga e 1997 se’ia o’o mai i le taimi nei.

O ia fo’i o se alo o le atunu’u, sa iloga lana ta’alo i lea fa’agatama i tausaga ua mavae.

E tele matāti’a ua fa’amauina i taumafaiga a lea tamāli’i o Samoa, le afioga iā Tuaopepe Asiata Jerry Wallwork, 50 tausaga o le soifua mai lona afio’aga o Savaia Lefaga.

O ia matāti’a e aofia ai;

Le ausia e Samoa o le ulua’i pine siliva i ta’aloga o le Olimipeka, e pei ona fa’apaleina ai le tama’ita’i lauiloa o Samoa iā ‘Ele Opeloge i le tausaga 2008.

O le 2019, na fa’amauina ai le pito tele o pine auro a Samoa na maua mai le ta’amilosaga o le World Championship.

Na avea ma Sui Peresetene o le Fa’alapotopotoga Si’isi’i U’amea Mamafa a le Itulagi o le Oseania (Oceania), a’o se Sui fo’i mo le Fa’alapotopotoga Si’isi’i U’amea Mamafa a Mālō o le Taupulega (Commonwealth).

O lo’o galue fesoasoani fo’i i au si’isi’i u’amea mamafa a isi atunu’u o le Pasefika, e aofia ai Fiti (Fiji), le Atu Kuki (Cook. Islands) ma isi.

Ona o ia matāti’a iloga ua ia ausia, na pāsia ai e le Kapeneta e tusa o le fautuaga a le Komiti Fa’atonu sa iloiloina nei fa’ailoga tauāloa, le tatau ma talafeagai, ona tu’uina ai le fa’aeaea a le Mālō ma Samoa atoa mo Tuaopepe.

O le ala lea, o le tau’ā’aoina ai o le fa’ailoga tauāloa o le Ofisa o le Poloā’iga a Samoa (Officer of the Order of Samoa).

O le Ofisa o le Poloā’iga a Samoa, e mafai ona fa’ae’eina atu i ‘ai latou na faia saofaga iloga ma le ta’uleleia mo Samoa, ma i latou sa matuā galulue ma le filigā i so’o se taumafaiga e le gata i totonu o le atunu’u ae fa’apea fo’i i tulaga fa’avāomālō mo le ta’uleleia ma fa’amanuiaina ai Samoa.

O Tuaopepe Asiata Jerry Wallwork na soifua mai i le Aso 29 Aokuso 1972. O ia o se tamāli’i faipisinisi, ma o le Fa’atonu fo’i o le Kamupanī o le Island Rock Ltd.