Maua atu le tino maliu o se tamā o loo taatia se laau malosi i ona autafa

0
2571

Ua faamaonia mai e le Sui Komesina o le Matagaluega o leoleo ia Papalii Monalisa Tiai Keti, le lipotia mai i leoleo o le tino maliu o se alii 48 tausaga mai Aufaga Lepa i le vaiaso na mavae nei.

O le Aso Faraile sa lipotia mai ai le tino maliu o lea alii ua maua atu o loo taatia le laau malosi i le ituaiga o le .22 rifle i lona autafa.

“O loo masalomia le aupega malosi sa faaogaina, ona sa maua ai i le nofoaga sa maua ai le tino maliu.”

O lea alii e tusa ma le lua aso talu ona le vaaia i lona aiga, o lea sa sue ai loa ae maua atu ua leiloa ona foliga i ona manuaga.

Sa faamaonia mai e le alii leoleo Satini ia Solomona Aimaasu o le vaega o le Stats, “O le tulaga lea e faigata ai ona maua tonu pe sa pule i le soifua pe leai, ona e maua le tino maliu ua leiloa foliga ma e faigata ona iloa tonu le mafuaaga o le maliu.”

O loo faaauau suesuega a leoleo i le mafuaaga o lenei faalavelave ma ua taua e le tamaitai Sui Komesina ia Papalii, e lei faamaoniaina le pule i le ola (sei tulou).

“O loo taitaia e le Ofisa i Lalomanu lenei mataupu ma o loo fesoasoani iai le CID ina ia auiliili le suesueina o lenei mataupu”.

O loo taua foi e leleo o loo maua i faamatalaga, na iai se feeseeseaiga i le va o lea alii ma lona uso i le aso mulimuli na vaaia ai o ia.


Maina Vai