O masini pueata o loo i magāala o le taulaga, sa faapipii e le matagaluega o leoleo mo tapenaga o le fonotele a Malo o le Taupulega (CHOGM), lea sa maua ai ni alii se toalua o loo faatau fualaau faasaina i le Maketi o Ia i Savalalo.
E toalua ni alii na maua e leoleo i le po o le Aso Toanai i le fale i’a i Savalalo, e pei ona faamaonia mai e le komesina o leoleo le tofā ia Auapaau Logoitino Filipo.
Saunoa Auapaau, “O i laua nei e toalua na pu’e e leoleo, na maua ai fualaau faasaina o le aisa, mariuana ma paipa e faaaoga e ula ai le aisa.”
E 32 tausaga o le tasi alii mai Leauvaa ma Saleimoa, ma le isi alii e 21 tausaga mai Laulii ma Magiagi.
Ua faailoa e le komesina, o masini pueata o loo faapipii i autafa o le auala na maua lelei atu ai lava nei taulelea o loo faatauina fualaau faasaina i le falei’a i Savalalo.
O taumafaiga nei a le matagaluega o leoleo ina ia saili i latou o loo faia solitulafono ma tafi esea fualaau faasaina mai i totonu o le atunuu.
Ua le misi lava se vaiaso ma osofaiga a le matagaluega o leoleo i nofoaga o loo mata’itu e le matagaluega o loo faatauina ai fualaau faasaina.
Ua maitauina pea le siitia o solitulafono o loo tutupu mai, e le na’o nofoaga e pei ona osofai e leoleo ae ua oo lava i tagata taitoatasi, ua faatau savali fualaau faasaina i totonu o si o tatou atunuu.
O loo i luma fo’i o le faamasinoga maualuga se mataupu o loo molia ai se tina sa faatau ana sanuisi, ma faatau atu ai ma fualaau faasaina.
O le Aso 9 o Iuni e tulai ai i lā’ua nei i luma o le faamasinoga e tali atu i moliaga o le uumia ma le faatauina o fualaau faasaina.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
