Ua molia se alii o loo nofo sala i le toese i Tanumalala, ina ua tuuaia le maua ai o laau faasaina i totonu o le falepuipui.
I taualumaga le Faamasinoga Maualuga i le amataga o lenei vaiaso, na tulai ai se alii o loo nofo sala i Tanumalala, e tali atu i moliaga o le umia lea o fualaau faasaina o le marijuana
O loo teena e Sefo Amituana’i moliaga o loo tuuaia ai lona umiaina o fatu marijuana e 27, faapea ma lala marijuana e 34 e tusa lea ma le 13.48 kalama lona mamafa.
O loo tuuaia e le Itu a Leoleo, sa maua uma atu nei laau faasaina ia Sefo Amituana’i, o se alii o loo nofo sala i Tanumalala.
O se itu na tuuin atu e Fepuleai i lē ua molia, “E fai si ogaoga o tuuaiga e faasaga ia te oe, ona o lea e te nofo i totonu o le toese, ao lea e maua fualaau faasaina ia te oe..”
Ina ua faatulaga atu e le Alii Faamasino le Aso 19 o Aperila 2023 e toe valaau ai lenei mataupu, ae tulai Sefo Amituana’i e faailoa i luma o le Faamasinoga, o ia e magalo i le Aso 3 o Aperila 2023.
Sa saunoa Fepuleai, e magalo lava ae moomia le tulai i luma o le Faamasinoga i le Aso 19 o Aperila mo le suesueina o le mataupu.
Tā’ua e le Alii Faamasino, o le aso foi lea o le a valaau ai molimau a le itu a leoleo, e molimau i lenei mataupu. Ae o le avanoa foi lea e aumai ai molimau a Sefo Amituana’i e lagolago ai lana mau tetee i moliaga.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
