“Matou te omai e fia fai so matou sao mo Samoa. O i matou o Samoa, o loo fai matou ma ave fu’a mo Samoa, e faalauiloa atu Samoa i le lalolagi..”
O lagona ma finagalo ia o alo lauiloa o le atunuu o le a pepese i le koneseti ua faaigoaina o le Motherland.
Na taua e J Bookz mai Amerika, “O matou o Samoa, o matou o ave fu’a mo Samoa, o loo matou faailoina atu si o tatou atunuu, ae ua lagona le tatau ona matou omai matou te faafiafia i luma o tagatanu’u Samoa, aemaise se sao mo le faamanatuina o le Tutoatasi o Samoa.”
Ae tā’ua se finagalo le alii pese o loo ia uumia le faailoga o le Masters i le Musika mai le Iunivesite o Otago, o Lesā Metitilani Alo, o le latou tuufaatasi ma malaga mai, e fia momoli mai ai foi se feau mo alo pepese ma le fanau laiti (young talent).
“O le taleni ua ia te oe, ia faalautele, ma faaaoga e faailoa atu ai le tatou aganuu..”
Saunoa Lesā, e leiloa o oe o se Samoa pe afai e leai se aganuu e iloa ai o oe o le Samoa.
“E iloa oe i lau aganuu ma lou loto nuu, o le loto lena, lea ua mafua ai ona tatou mafuta nei i si o tatou atunuu, sei fai se matou fo’i sao.”
Ae na tā’ua foi e sui o le Tomorrow People, o se fiafiaga tele ia i latou le maua ai lea o le avanoa e pepese ai i Samoa nei.
“O le faanaunautaiga, ina ia toe maua se isi mafutaga faapenei, aemaise o le moomoo ia maua se avanoa e pu’e ai se fatuga pese poo se MTV i Samoa nei.”
O se koneseti pito sili lea ona toatele ai ni alii ma tamaitai pepese lauiloa i le tala faasolopito o koneseti i le Pasefika. O i latou uma nei ua lauiloa e le gata o Samoa, ae o le Pasefika ma le lalolagi atoa.
O le polokalame ua tuuina mai, e amata atu ai lava i le 1:30pm se ia faaiu e Fiji lenei koneseti. Ae o le itula o le 11am i le taeao o le a amatalia ai lenei koneseti i nisi foi faafiafiaga.
Ua tatalo mai ai le Sui o le Matagaluega o Tagata Tafafao Maimoa mai Fafo, le afioga ia Taimalelagi Tutuila, e valaaulia ai le mamalu o le atunuu e tatou te auai faatasi ai.
“Samoa e, o lou avanoa lea, aumai lou aiga, ma le fanau, sei o tatou molimauina lenei avanoa tāua.”
Job Vacancies
