“Samoa Unoi, tulou lava lau susuga i le faafeagaiga, a o upu ia ua ē lafoa mai i le matou nei aiga, toe faafoi atu au upu.”
O le saunoaga lea a le Taitaifono o le Faatuatua i Le Atua Samoa ua Tasi le afioga ia Laaulialemalietoa Leauatea Polataivao Fosi Schmidt i le polokalame faalevaiaso, Fofola le Fala ma au Tusitala.
O se feiloaiga a le vaega faaupufai e Puipuia le Aia Tatau A Tagata i lona nofoaga autu i Petesa, na valaaulia ai e le HRPP le susuga i le faafeagaiga e na te taitaia le faalauiloina o vaega muamua o le latou anavatau.
Peitai na saunoa ai le susuga ia Samoa Unoi, “Soo se vaega faaupufai lava e faaaogaina le suafa o Le Atua, e malaia.”
Ina ua tali le taitaifono a le FAST, na saunoa Laauli, “O upu ma le talalelei o le fōfō alamea pe ā tutupu ni faafitauli, ma aumai ai le mana e fōia ai mea uma..”
“Ae ua matou maitau atu ua tuu le galuega sa tatau ona fai, fai se galuega i ō, fai se galuega i inei ae ua ese ia saunoaga.”
“I le suafa o Le Atua le Tama, le Alo ma le Agaga Sa, toe faafoi atu au upu, I rebuke in the name of Jesus, toe faafoi atu au upu, Samoa Unoi, tulou lau susuga i le faafeagaiga, toe faafoi atu au upu.”
Na faailoa e le Taitaifono o le latou talitonuga, o le Faatuatua i Le Atua Samoa ua Tasi, ina ia tasi le atunuu ma maopoopo ma fealofani.
“Return to sender, matou te lē talia ni ituaiga faamalaia faapenei, matou te lē talia ituaiga saunoaga le migao ma le lē mafaufau faapenei.”
Saunoa Laaulialemalietoa, ua latou faamagalo i le faifeau ma latou tatalo ia manuia tele o ia.
“Matou te faamagalo ia te oe, na matou tulivae ia faamanuia ia te oe, ae e lē malaia le aiga lenei, ma e le tupu le mea lenā.”
Ao faitau vaiaso ona tatou tuuvae lea i le faiga filifiliga a le atunuu e saili ai taitai mo le isi lima tausaga, ua maitauina foi i luga o le social media, le fesopoa’i o manatu ma faamatalaga faifai ma le tau faaleaga a le isi itu i le isi itu, ua oo foi lava i tamaliiaga o tagata taitoatasi ua aafia tele i tulaga faapolokiki.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
