Manumalo i Faigapalota Laiti Faipule Uma o le FAST

0
167

O faipule e toatolu sa faamavae mai le vaega faaupufai e Puipuia Aia Tatau a Tagata, ua latou manumalo nei i faigapalota laiti sa faataunuuina i le Aso Faraile 15 Setema 2023.

Sa tauva Ale Vena Ale, Tuuu Anasii Leota ma Mau’u Siaosi Puepuemai i lalo o le fua a le Faatuatua i Le Atua Samoa ua Tasi (FAST). O le a toe foi i le Maota Fono i latou, ma faaopoopo ai nofoa e tolu mo le FAST o loo tulai mai i le faigapalota i le taimi nei.

Sa faalauiloaina mai e le Ofisa o Faigapalota faaiuga aloaia o palota laiti e tolu sa faia i le Aso Faraile.

I le faitauga muamua (preliminary results) a le Ofisa o Faigapalota e pei ona faalauiloina, sa tulai mai ai le tofa ia Ale Vena Ale i le tulaga muamua ina ua ia ausia palota e 867. O le tofa ia Ulu Bismark Crawley e  396 ana palota ma tulai mai ai loa le 471 palota o loo eseese ai.

O le faitau aloia o le a faatoa faitau ai palota muamua (pre polling votes) e 146 mo le itumalo o Faleata 4.

Mo le itumalo o Vaa-o-Fonoti sa mamao lava le manumalo a le alii faipisinisi ia Mauu Siaosi Puepuemai. E 739 le aofai o palota a Mau’u i le 201 a Leausa Dr Take Naseri. O loo eseese i palota e 538, ae mo Feutaga’imealelei Osovale e 32 ana palota na maua. E lua falepalota e leai ai ni palota a le suitauva. E na o le 16 palota pre polling a Vaa-o-Fonoti.

O le itumalo o Siumu, e 599 le aofai o palota a le tofa ia Tu’uu Anasii Leota. O le tofa ia Faalogo Kapeli, o se malu le Malo na tauva Tutoasi, e 505 ana palota. E 94 le aofai o palota e eseese i la’ua. Ae o le tofa ia Tu’uu Amaramo o le HRPP, e 184 e aofai o ana palota. E 68 le aofai o palota muamua (pre polling).

Ina ua tuuina mai le faitau aloia e le Ofisa o Faigapalota, e leai se suiga tele na iai, ma faatumauina ai pea le manumalo o le FAST i Itumalo uma nei e tolu.

 

Mo itumalo e tolu sa faatino a latou faiga filifiliga e 62% tagata sa resitaraina mo le itumalo a Faleata 4 sa faatino latou palota, ae 61% mo le itumalo Vaa-o-Fonoti, ae 59% mo le itumalo o Siumu.

I le tulai mai ai o Sui Faipule e toatolu ua 35 ai nofoa o le FAST i le Maota Fono o le Palemene o Samoa.