Manuia Faifaatoaga i le “Samoa Noni Loa” a le Wilex

0
159

O le taeao ananafi lea sa faalauiloa ai le vai nonu ua faaigoina o le ‘Samoa Noni Loa’ e gaosiaina e le kamupani o le Wilex Samoa i Lelata.

O lea vai o loo gaosia lava i Samoa nei ma utu faguina mo le faatauina atu i maketi i fafo.

Na faailoa e Tagaloa Eddie Wilson o lenei matati’a fou ua faalauiloa i le aso o loo atagia ai a latou paaga lea e tusa ma le 85% o tina ma fanau a le atunuu (women and youth).

Tagaloa Eddie Wilson with his wife Carol, and their children Nathan and Nicole Wilson.

“I know we have had a very devastating two months for our country, but our message is very simple, Wilex is helping in its own little way the farmers in the nonu industry, 85% of the people that Wilex work with are the farmers which are predominantely women and children,” said Tagaloa.

E ui o le 1996 na amata auina atu ai e le Wilex le nonu i fafo, ae tusa lava ma le lua tausaga na taumafai mai ai Tagaloa ma lana aufaigaluega ina ia tino le faamoemoe lea sa faalauiloa i le aso.

E tusa ma le 5,000 aiga i totonu o le atunuu o loo ua mautu faatoaga nonu ma o loo faipaaga ma le Wilex i le aoina o le nonu aua maketi ia i fafo.

“Pau lea o le meaalofa a le Atua ia Samoa e le sioti, o le advantage o le nonu, e fua faasoloatoa le nonu a Samoa.”

Na faailoa fo’i o loo iai tagata tomai faapitoa i le gaosia o le uaina mai fafo lea sa fesoasoani mai i le Wilex aua lava le gaosiaina o le Samoa Noni Loa.

Sa masani lava e maua le sua o le nonu (pure) peitai o lea ua faapea ona maua i le mau flavour eseese e pei o le pineapple, mango, soursop, ma le honey. O a tatou tropical fruits ia, ae o loo taumafai foi le misiluki e gaosia ai lea vai inu.

E iai le manatu o le pulega ma le aufaigaluega a le Wilex, o le iai o isi flavour poo tofo eseese nei e mafai ona faaoga ai fualaauaina o loo maua i lo tatou atunuu.

O lenei auaunaga o le a agavaa ai foi o tatou tagata o loo iai faatoaga o fala ma sasalapa faapea mago ma le meli suamalie (honey). O le a mafai ona faatauina e le Wilex aua le faaogaina i le gaosia o le Samoa Noni Loa.

Na faailoa e Tagaloa o le luitau lava o loo feagai pea i le taimi nei ona ua tele le tauvaga i fafo ma ua utiuti ai le maketi mo le nonu lea e auina atu e le Wilex Samoa.

O le isi foi tulaga ua suia le manaoga i le nonu e auina atu ua manaomia le nonu utu fagu, ma o le ala la lea ua agai ai le Wilex e fausia seisi foi faiga fou mo le nonu a Samoa.

O nisi o tulaga manuia o le nonu e mafai ona faaitiitia ai le toto maualuga, faaitiitia ai le ga’o i le tino, o ponaivi tiga, ma o ia tulaga uma ua maea suesueina e saienisi.

O loo ua maua foi i tamai pepa (pouch) 30 kalama se inu maga mo taeao taitasi faapea foi i le afiafi.

“Its a really good energy booster, and its healthy, it is also good for the immune system, and very good for fever, and the flavours will make it easier for you to drink it”, Tagaloa Eddie Wilson

E tusa ma le 28 pouches i totonu o le pusa e tasi,  pe a ma le $18.00 i le pusa o loo tilotilo iai Tagaloa mo le faatauina i totonu o Samoa.

O loo faamoemoe le Wilex Samoa e auina atu lenei fagu vaiinu o le Nonu i atunuu e pei o Fiti, Saina Korea, Hawaii ma Amerika, ae le’o aofia ai isi maketi o loo iai le manaoga i le taimi nei.

O le faamoemoega lava o Tagaloa ma le kamupani a le Wilex ia tele se maketi e taulia ai lenei vai i fafo. O le vaega taua, o le a tele ai foi le manaomia o le nonu e faatau mai o tatou faifaatoaga. O se itu taua tele lea ona e siitia ai le tamaoaiga ma manuia ai atiinae o loo faatupe ai aoaoga a le fanau ma le soifuaga maloloina o aiga.


Maina Vai