Manu’a se Tamaititi 13 Tausaga i se Laau Malosi

0
162

Ua faamaonia mai e le Komesina o le Matagaluega o Leoleo ma Falepuipui, le afioga ia Auapaau Logoitino Filipo, se faalavelave o loo faataotolia ai se tamaititi 13 tausaga i le falemai i Motootua, ina ua lavea o ia i se pulufana sei tulou.

Sa tā’ua e Auapaau, o loo taofia nei lea atalii i le falemai, ae o le taeao o le Aso Sa 17 o Iulai na tulai mai ai lenei faalavelave i le afioaga o Afega.

O se tamā na agai ma se laau malosi e faalalo ai se mea tuaolo aua taumafataga o le Aso Sa.

Peitai na faaletonu le faatinoina o lea gaigoiga, lea na mafua ai ona aafia se tamaititi 13 tausaga le matua.

“E le o se atalii o lē sa tauaveina le laau malosi le tamaititi lea sa faamanualia..”

O nisi o le afioaga o Afega sa latou faapea mai, na lavea le puaa (sei tulou) i le fana a le toeaina, peitai, e lei pa’ū le puaa ae ua alu i le atoa.

I se faamatalaga a nisi o le afioaga, na tuli tamoe loa lea e lenei tamā le puaa, ma toe faapa lana fana, ma o inā tonu lea sa lavea ai loa le tamaititi.

Saunoa le Komesina o Leoleo ma Falepuipui, e le o iai se isi ua taofia e le matagaluega i le taimi nei, ae o loo faagasolo pea suesuega a leoleo, ma e ono iai ni moliaga e faasaga i lea tamā pe a maea suesuega a leoleo.

Update: I se tala mai le falemai i Motootua, o loo taofia nei le atalii i se ward, ma o loo faasolo manuia o ia.

I nisi o faalavelave tutupu, o loo faasolo sailiiliga a leoleo i se tino maliu o se tamā, poo le va o le 55 agai le 65 tausaga le matua, lea na maua atu lona tino maliu i autafa o se auala taavale agai tua ma le auala tele a le Malo (main public road) i le afioaga o Vaigaga.

Saunoa Auapaau, “o loo faagasolo iai suesuega a leoleo pe lē o aafia ai se tulaga faasolitulafono i le maliu ai o lenei tamā, ma o le a toe maua se tala lata mai pe a maea ia suesuega.