Manatua pea le Tautua a Tupuola Tusa Misi Tupuola mo lona Itumalo

0
3498

E manatua pea le tautua a le afioaga ia Tupuola Tusa Misi Tupuola ia Samoa ae maise o lona itumalo ao ia tauaveina le tofi Sui Faipule mo Falealili i upu fai a Samoa.

O sauniga i le malumalu EFKS i Matautu Falealili, na faatofā atu ai aiga, uo ma e masani faapea le Malo o Samoa i le afioga iā Tupuola Tusa Misi Tupuola.

I le saunoaga a le Fofoga o le Maota o Samoa le afioga iā Papalii Lio Oloipola Taeu Masepau, lea na fai ma Sui o le Malo, sa ia faamanatuina ai le saunoaga faataupou a Tupuola Misi, ina ua faatoa tulai mai o ia e fai ma Sui o le Palemene.

I faamaumauga a le Palemene i le silia ma le 12 tausaga talu ai i le Aso 20 Iuni 2011, sa saunoa ai Tupuola Misi e talosagaina ni vaega tāua sa moomia e lona itumalo o Falealii.

“E utiuti le suavai i le itumalo o Falealili.. O le itu tau soifua maloloina, e na o le tasi le aso e tatala ai le falema’i faaitumalo i Falealili.. E moomia se taavale mo le faatinoga o le auaunaga a le ofisa o leoleo i Poutasi..”

“E tatalo atu sei silasila ane le Malo i vaega ia mo si ou itumalo…”

Talofa le tofa sa faufau e manuia ai le atunuu, auee ua maliliu toa ua maimau ai aupega o le taua..”

O le Aso 14 Mati 2011 na filifilia ai Tupuola Tusa Misi Tupuolale I le palemene ma ofi atu ai i upu fai a le Malo mai le 2011 agai atu i le 2016 i le paeaega lona 15.

Sa avea o ia ma Minisita Lagolago o Galuega Tetele, Atinae ma Felauaiga. Sa taitaifono i le Komiti Faapalemene o Galuega Tetele. O se Sui o le vaega faaupufai e puipuia le aia tatau a tagata le HRPP.

O le afioga i le Fofoga Fetalai o le Maota sa ia tauaaoina le tagavai a le atunuu, ma tuuina atu ai i se tasi o alo o le afioga iā Tusa.

O le sauniga sa auai ai foi le Ao Mamalu o le Malo, afioga ia Tuimalealiifano Sualauvi Vaaleto’a, faapea Minisita o le Kapeneta ma Faipule o le Palemene o Samoa.

Manuia tele lau malaga lau afioga Tupuola Tusa Misi Tupuola. Faafetai mo lau tautua mo Samoa.