Manatu Tusitusia: Sa mua’i sui e Malietoa Laupepa i le 1892 le International Date Line

0
3812

Letter to the Editor – Manatu Tusitusia

I se Manatu Tusitusia faaalia (Letter to the Editor) a le Taitai o le vaega faaupufai o le HRPP, i le Faatonu o le pepa o le Samoa Global News, (Aso 13 January 2024), sa faaali ai le faa gau le malie a lana Afioga, i le Matagaluega o Turisi e tusa ai ma faaaliga mea faapapa, poo fireworks e faatalofa atu ai i le Tausaga Fou o le 2024.

Taitai o le Itu Agai afioga Tuilaepa Sailele Malielegaoi.

O le auga o aute o lona manatu, na folasia i le faaiuga o lana tusitusiga (opinion) pei seai ua atugalu i le faigamalo i le lē lava tapena, e faafeiloai le Tausaga Fou mo le atunuu.

Ua ia faaalia faapea, o Samoa e muamua ona faafeiloai atu i le alu a’e o le la, ma muamua foi ona vaaia se taeao ma le aso fou. Ae faai’u lana saunoaga faapea…

“Sa ia nofo i le gale, ma matamata i News, ma fesuisuia’i lana remote, e maimoa i Fireworks, i Argentina, New York, Indonesia, Hong Kong, Iapani ma Niusila…

“….Ae o a faafiaga a Samoa?? Lipi ma se mea..”

Toe faamausali lenei manatu e faai’u i ai lana faatofalaiga, e faapea:

Ae na faafeiloa’i atu le Tausaga Fou 2024, (a Samoa) i leo lagona eseese, tauala mai i puisu (tulou).,,

(‘And the first country of Samoa to welcome the New Year, nothing….

…So, for 2024 we celebrated very soundly with only our nostrils…’)

YES, I TOO AM BEWILDERED, BAFFLED AND CONFUSED. AE TATOU TE TOE FOI MAI I LE FUAIUPU LEA, I SE TAIMI.

File photos: mea faapapa – fireworks in Apia 01 Jan 2024. Photos: SGN.

O lea ua a’e ai loa se manatu vaivai i lo’u nei tagata faatauvaa, sei saili tonu le uiga o lenei ‘manatu tusitusia’, ae poo le a tonu foi le aano, ma le mafuaaga, ua gagana ai i nei upu, poo saunoaga.

I le matau a nisi, e le gata e le talafeagai, ae ou te ta’u tino atu Samoa, e aunoa ma se mamalu. Pei seai ua sola le tofā, ae fotuai mai uiga ma manatu paganoa ma le tau tua’oia.

Na amata lava lana faaaliga, faapea mai,…’ i le sefulu tausaga talu ai, na pasia aloa’ia ai e le komiti o le lalolagi e faafoea, le laina e fua i ai le taimi o le lalolagi (International Date Line in London) o Samoa o le a suia le aso, ia tutusa ma Ausetalia ma Niu Sila.

Sa ia tuuina atu ai le talosaga, ma talia ai e faatatau i mafuaaga (justification) i mea tau pisinisi, ma fesootaiga, ma atunuu tetele ua tā’ua, ina ia sologa lelei tulaga tau pisinisi.

Peitai, na faaalia e lana Afioga, o le mafuaaga tonu lava, o lona maasiasi i le avea ai o Samoa ma atunuu e mulimuli ona goto ai le la, poo le mulimuli foi ona maua News o le lalolagi. Ae le gata i lea, ina ua oo mai le Tausaga 2000 ua ta’ua o le New Millennium, o Samoa lava na mulimuli faafeiloai lea Tausaga, ma lea laasaga fou.

Ae o le fesili a lo’u nei tagata.

E a la pe a mulimuli oo mai le New Day ia Samoa, i aso uma? O le a le mea o iai pe afai o Samoa lava e mulimuli goto ai le la?

I le matau atu, o le sipili (spirit) o le manatu tusitusia a le toeaina, vae ane ona mamalu, e foliga mai… Sa nofonofo lava ua leai sana interview e fai i le au fai News, kope loa le tusiga o lana Opinion, ma faaali mai talaaga o mea i aso anamua, lea ua masani ai le atunuu.

Aua a fua iai, pe a faasolo lau faitau, ma le matau atu i upu, ma uiga o upu, faapea foi le faasologa o ona manatu, e fai lava sina papa’u poo le ‘superficial‘ o nisi o a na faaaliga.

A tuu foi i se isi gagana… Ua leai se faatofalaiga mamalu. E mafai foi ona toe faaaoga i ai ana upu sa ia gagana ai i totonu o le Maota Fono, “Ua pei o le alu o se paopao e leai se kapili..”.

Silasila foi i ona uiga faamaualuga, ma pei e mimita. O ia lava na ala ai ona suia le International Date Line, ma avea ai loa Samoa, o se atunuu muamua lava ona vaaia foliga o le Aso Fou, poo le alu a’e o le la.

Peiseai e faapea… ana leai le suiga o le International Date Line e lana Afioga…. faapenei ua behind Samoa i le tele o tulaga ta’uta’ua, poo telegese i tulaga tau pisinisi…ma isi…

Peitai…

O le mea muamua e tatau ona faasa’o. Ma ia manino i le Mamalu o le Atunuu.. e le o latou na muamua suia le International Date Line, lea ua aeae ai nei Samoa i lenei vaitau.

Aua nei iai se manatu faapea, O le poto ma le atamai, o le Taitai a le HRPP, na ia suia ai i lona malosi ma lona atamai, le International Date Line.

Pau le mea na fai e lana Afioga, o le sa avea ma Palemia i lena taimi, o le toe faafo’i o le Internationa Date Line i le Pasefika, i le tulaga sa i ai i senturi ua mavae.

O le a le uiga o lea tulaga?

Silasila foi. Ia manatua Tausaga nei e lua, o le 1892, ma le 2011.

O le International Date Line, o le history poo le tala faasolopito o le Pasefika, sa i ai lava le laina lea o le Date Line, i le Faatulagana, lea ua tatou i ai NEI I LENEI TAIMI..!!

Fia selau senturi o iai Samoa (ma isi atumotu o le Pasefika) i le itu i Sisifo (West side) O le International Date line, lea…

Peitai.

O le Tausaga 1892 (onosefulu tausaga talu na taunuu le lotu i Samoa), na a’e ai loa se tofa i le Tupu o Malietoa Laupepa (le grandson o Malietoa Vaiinupo lea na taunuu mai ai le lotu LMS 1830) e tusa ai ma le fautuaga poo ‘persuasion’ a le Traders mai Amelika.

Sa fautuaina Malietoa Laupepa, ina ia adopt loa e Samoa, le taimi a Amerika i le itu i Sasae o le Dateline (ma tolu ai loa itula e behind o Kalefonia).

O lea suiga, sa faatino i le aso e tā’ua e Amerika o le American Independence Day, aso 4 o Iulai. O le aso lena sa avea ai loa Samoa ma taimi tutusa, ma Amerika, poo le itu i Sasae (East)…

Clipping from The Evening News (Sydney) of 20 July 1892 announcing the date change of Samoa (image source: National Library of Australia)

O le isi pine faamau o lea tala faasolopito… e maua mai ai le tali o le fesili lenei?

Aisea na faaigoa ai Samoa i Sisifo WESTERN SAMOA…..ae faaigoa Samoa i Sasae, AMERICAN SAMOA??

Ese le manino o le Tali.

Ina ua taunuu papalagi, ma le lotu i Samoa, o le taimi lena, sa i ai Samoa i le itu i Sisifo or WEST, o le international Date line.

Peitai, sa maitauina e le au misionare ma le au Traders femalagai, Eastern Samoa, i lalo o le vaaiga a Amerika, sa i le itu i SASAE o le laina lava lea.

O iina na a’e ai loa le WESTERN SAMOA (ona sa i le itu i Sisifo – West)….ae o le EASTERN poo le AMERICAN SAMOA, sa i le itu i Sasae..

Peitai, ole Tausaga 2011, sa toe suia ai loa le tatou Date Line, ina ia tutusa ma Ausetalia ma Niu Sila.. E mafai foi ona faapea, sa toe faafo’i lava le tatou International Date, i le mea sa iai muamua ae le’i suia i le tausaga 1892, e Malietoa Laupepa ma papalagi Amerika, sa fautua i le tupu, i lena vaitau.

O le mea taua, ua leva na iai Samoa i le itu i Sisifo o le Dateline, pei ona tatou i ai nei, i le suiga o le tausaga 2011.

Ua toe foi lava tatou i le mea na iai muamua.

O le isi tulaga, e fia faailoa.

O ai le atunuu e muamua vaaia le Sunrise, poo le alu a’e o le la?

Sunrise in Savaii, Oct 2023. Photo: SGN.

E lua tali o le fesili.

I le taimi lea ua tatou i ai nei, ma le faavasegaina o le Date Line, ae e le’i suia le Daylight Savings a Niu Sila, o le Nuu o Gisborne i Niu Sila, o latou sa muamua lava vaaia le alu a’e o le la, (Sunrise) i aso taitasi.

Peitai, e oo loa i le vaitaimi o le daylight savings a Niu Sila (i le aso Sapati mulimuli o Setema) o iina e mafai ai loa ona avea Samoa ma atunuu (developing nation) e muamua ona vaaia le susulu o le la…

Peitai, e i ai le atunuu laititi poo le atumotu, e muamua atu i lo Samoa. O le atumotu lea ua ta’ua o Kiribati. O le motu laititi i Kiribati ua ta’ua o le Mellinium Island, o i latou e muamua susulu i ai le la, ma sanisani faamanuao ai manu o le vaveao. Ae le o Samoa.

Ona faai’u atu lea o le manatu a le auauna.

Pei ona outou faitau i le Opinion ma le manatu a le Taitai o le HRPP, sa tele lana tusi i mea foi ua ou tā’ua. O le history o le International Date Line, ma le fesuiaiga e Samoa ia toe foi lava i le itu o le Date Line, sa iai muamua.

Ae o le a tonu le uiga o lenei tala faasolopito i le tala tusia a le taitai o le HRPP?

O le faaulu tala o lana tusitusiga, e faasino, i le lē lava o tapenaga mo le atunuu e faafeiloai atu ai i le Tausaga Fou.

Ae ua avea mea faapapa (firewords) a Samoa, pei e foliga mai…”Ua aafia ai puisu o le atunuu”… (Tulou le gagana)

Ia pau lava le tali i lea manatu ….e tatou te fiu e faavasega, poo le a le fesootaiga o le suiga e lana Afioga o le Date Line a Samoa,…ma le manogi o mea faapapa, ua aafia ai puisu o le atunuu (se’i tulou).

Ae se’i fai foi lenei tusi, poo le manatu faaalia, i le tasi, lua, pe tolu aso ina ua mae’a le Tausaga Fou.

Ae o lea ua toeitiiti oo mai le Aso Maliu, a o lenei faato’a gagana si toeaina, i le taunuu mai o le Tausaga Fou 2024.

Ae mo le fautuaga mo le atunuu. Masalo o loo mana’o le Taitai ole itu agai ia tautuana o tatou tui puipuia mai le faama’i o le Koviti.

Ona o le faamai, e aafia ai manogi o mea taumafa. Ma aua nei toe latalata se isi i ni faga ofe… ma le aafia ai o puisu o le atunuu.

Ma lo’u faaaloao lava.

Faafetai.

Taulapapa.