Manatu Faaalia: Taofi le Toe Fa’asalalauina o Ata o Fanau A’oga i Nofoaga Faitele

E muamua ona ‘ou fa’apoipoi lili’a tuvanu i pa’ia ma mamalu o Samoa. O pa’ia lava mai ile vavau e o’o lava ile fa’avavau.

Ae ua laga se leo ona ose mata’upu ua maitauina ua le o gatusa ai ma le galuega olo’o fa’atinoina e lenei fa’alapotopotoga ole ‘aputiputi o fanau talavou aemaise lava fanau tama’ita’i.

O le ala lea ua aumai ai se lagona ia te a’u nei ole Ta’ita’i o lenei faalapotopotoga mo tupulaga talavou e tatau ai ona tu’uina atu se fa’amatalaga i lenei mataupu tuga ma ogaoga is a matou va’ava’ai.

O le matā’upu lea e fa’asino tonu ile tamā e suafa ia Va’amu Brown, ina ua ia pu’e ma fa’asalalauina se video ile aso 13 o Iulai 2022 ile nofoaga fa’atalipasi i Savalalo.

I sa’u maitau fa’ata’ita’i mo tupulaga, e le’o iai se afaina o le mataupu a le tama nei ia Va’amu i lona naunau mo fautuaga i fanau a’oga. Ae o le matou matāfaioi ole ‘āputiputi o fanau ma i le fa’atāsinaina o tamālii’aga ile fa’aogaina o faasalalauga fa’aona po nei (social media).

Mo le silafia, o lenei gaioiga e manatu ai o se matua solitulafono lava.

O fanau a’oga o lo’o iai ne ii le va’aiga ma puipuiga a matua ona oloo iai i se laasaga e i lalo ifo ma le 21 tausaga le matutua.  O lona uiga e iai le puipuiga malu i le fa’asalalauina o latou foliga ma ata e aunoa ma se faatanaga aloa’ia mai matua po i latou o lo’o va’aia fanau a’oga (guardians).

O le isi itu, o le fa’aaogaina o ni upu e fa’alumaluma ai o latou tamali’iaga e aunoa ma ni fa’amaoniga o se gaioiga sa ta’ua i tala lafo. E pei o le upu na lafoina, “E le o se fale pa’umutu le fale nei”.

O le fa’aaogaina o nei upu e aunoa ma le silafia o le ogaoga o lona uiga moni ma se faamaoniga o se gaioiga o lo’o fai e tutusa ma le tala ua lafo e ono mafai ona molia ai ma faaulu se tagi a se o nei fanau i le ofisa o leoleo.

O le upu ‘paumutu’ ose upu e faaigoaina ai se gaioiga ua ta’ua o le faita’aga po’o se tagata ua faia ni amioga fa’atalitane.

E ogaoga tele nei lafoga, ma e manatu ai lo’u taofi o lafoga nei ua mafai ona aofia ai nei i le tulaga o upu fa’alumaluma ma le fa’aleagaina o se ta’uleleia o se tagata e aunoa ma se fa’amaoniga.

E fautuaina ai le tama nei ia Va’amu Brown, ina ia taofia ona toe pu’eina ma toe afea i se saunoaga alo ma fanau tupulaga o Samoa i tulaga leai ni fa’avae maumaututu.

O le popolega e iai fanau e ono avea nei gaioiga fa’asolitulafono e fai ma ala o le’a o’o ai i se isi tulaga ona o lagona a’afia.

Faamanuia tele Le Atua.

Fa’afetai.

Va’ai Nah Folasa.

Peresetene Logopuialii Samoa Youth Organisation

(0)