Ua iloga le mamao o le ta’imua a Seumafaleupolu Aperila Vaa Tiai i Falealili 1, ma Nonu Lemauga Laulu William Mauia i Vaimauga 3, i le faitauga muamua o palota laiti sa faia i le Aso Faraile 18 Setema 2026.
O faaiuga o loo iai nei e le’i aloaia, ma o loo faatali pea i le faitauga mulimuli a le Ofisa o Faigapalota lea e fuafua mo le Aso Toanai, 19 Setema 2026.
Falealili 1
I Falealili 1, o loo ta’imua Seumafaleupolu Aperila Vaa Tiai, o se tasi o sui tauva a le FAST, i palota e 426 palota i le taimi nei.
O loo tulaga lua le afioga Tuiloma Tusa Siiliili Laniselota Lameko i palota e 247, ma e 179 palota le vā o sui e toalua o loo ta’imua.
O isi faitauga muamua (preliminary count) e pei ona faailoaina mai e le Ofisa o Faigapalota:
- Auseugalelei Uiti Lagavale – 239
- Patea Taveuveu Taamaletoa Aipovi Patea – 179
- Taveuveu Willie Tuatagaloa Fetu – 156
- Fuaolemoli Falaila Faausu Allen – 124
- Si’a Faaletonu Alec Leaupepe Latu – 120
E tasi le nofoaga palota sa totoe e le’i aofia i le faitauga muamua na tuuina mai, o le nofoaga mo palota muamua i Matautu EFKS.
O le palota laititi lenei ua toe faia ona o le faaiuga a le Faamasinoga na faaleaogaina ai le nofoa o le sui sa manumalo i le Faigapalota Tele o Aukuso 2025, le afioga Toelupe Poumulinuku Onesemo lea sa ia umia le tofiga Sui Palemia.
Na manumalo Toelupe i le palota tele o le 2025 i palota e 941, ae tulaga lua Tuiloma Laniselota Lameko i palota e 617.
Peitai na faaulu e Tuiloma se talosaga tau palota ma mulimuli ane faamaonia e le Faamasinoga ni tuuaiga tau faiga faaalatua i faigapalota faasaga ia Toelupe. O le aso 24 Mati 2026 na faaleaogaina ai e le Faamasinoga lona filifilia e avea ma Faipule o Falealili 1.
Na taumafai Toelupe e lu’i lea faaiuga, peitai na teena e le Court of Appeal lana talosaga ia Iuni, ma tumau ai loa le faaleaogaina o le nofoa a le Itumalo.
O Seumafaleupolu, o ia o se tasi o sui e toafā a le FAST mo Falealili 1 i lenei palota laititi.
Vaimauga 3
I Vaimauga 3, ua toe malosi mai Nonu Lemauga Laulu William Mauia, lea o loo ta’imua i palota e 1,085.
O loo lona lua atu iai le sui o le HRPP, Vaiofuaiupolu Chris Fa’afo’o, i palota e 938, ma e 147 palota le vā.
O isi sui e toalua:
- Puaalatamai Tupuola Malaeulu Filemoni – 888
- Sooialo Feetau Lemigao Sooialo – 428
E tasi foi le nofoaga palota sa totoe i le taimi na tuuina mai ai le faitauga muamua, o le nofoaga mo palota muamua (pre-polling) i Tanugamanono EFKS.
E le fou Nonu i faigapalota a Vaimauga 3. O ia sa tauva mo le FAST i le Faigapalota Tele o le 29 Aukuso 2025, ma maua ai palota e 1,096. O ma palota sa tulaga tolu ai o ia i tua o Taioaliiseu Fiti Aimaasu o le HRPP e 1,465 palota, ma Lautimuia Uelese Vaai e 1,339 palota.
O lona uiga, o le 1,085 palota ua maua e Nonu i le faitauga muamua o lenei palota laititi, ua latalata lava i le aofaiga atoa e 1,096 na ia maua i le palota tele o le tausaga na tea nei — ae o loo totoe pea le tasi nofoaga e faitau.
O lenei foi palota laititi o se isi mataupu tulaga ese mo Vaimauga 3, auā o le faatolu ai lenei ona agai le itumalo i le filifiliga, talu mai Aukuso 2025.
Na manumalo Taioaliiseu Fiti Aimaasu i le palota tele o Aukuso 2025 i lalo o le HRPP. Na faamavae o ia mai le Palemene ia Mati 2026 ina ua fia lagolago ma auai atu i le vaega faaupufai o le FAST. O lea na mafua ai le palota laititi muamua ia Me.
Na manumalo ai le afioga ia Lautimuia Uelese Vaai o lē sa avea ma Minisita o Tupe, i le palota laititi o le aso 01 Me, i palota aloaia e 1,802, ae 996 a Taioaliiseu.
Peitai na toe lu’i le faaiuga i talosaga tau palota. O Iuni na faia ai le faaiuga a le Faamasinoga e faaleaogaina le palota laititi, ina ua faamaonia ni soligatulafono tau faigapalota faasaga ia Lautimuia ma Taioaliiseu.
Na faaleaogaina ai le nofoa ma lē mafai ai foi se isi o i laua ona toe tauva i le palota laititi o loo faia nei.
O lea ua toe foi ai Vaimauga 3 i lana faiga filifiliga mo le taimi lona tolu i totonu o le silia laititi ma le tausaga.
I le faitauga muamua o le Aso Faraile, o loo ta’imua ai Nonu Lemauga Laulu William Mauia, ae i Falealili 1 o loo mamao foi le ta’imua a Seumafaleupolu Aperila Vaa Tiai.
Faasalalauga Tāua
- 16 locals and 14 overseas-based applicants Pass the Malua Entrance Exam - October 13, 2026
- Fuafua le Malo e Toe Faatū Nofoa e Lua mo le Au Palota Tu Taulaga - October 11, 2026
- Tumau Tuia Pu’a Fuatogi Letoa i le Nofoa o Safata 2: Teena le Talosaga a Leleua - October 9, 2026
