Malolo Uma Galuega a le Malo ina ia Faia Tui Puipuia

0
829

02 Tesema, 2019

O le afiafi nei na saunoa faalauiloa mai ai le alii palemia o Samoa Susuga Tuilaepa Sailele Malielegaoi i le atunuu, e tusa ai o le faama’i o le misela ma faamaonia mai ai le tapunia o galuega uma a le Malo i le Aso Tofi ma le Aso Faraile nei.

Na tomua i le faamafanafanaga mo aiga ua avea fanau ona o lenei faamai matautia.
Ona ia faailoa ai lea o le matautia o le faamai o loo feagai ai nei ma Samoa…..”Tulaga ese le mala lenei o loo ua feagai nei ma tatou, e ese mai afa ma tsunami, o afi sasao, ma lologa sa aafia ai, e toatele i latou e fesoasoani, i le faama’i lenei ua na’o fomai lava e iai le agavaa, e le soona tagofia e tatou e le malamalama ai”
“O lea foi ua fesoasoani mai nisi o fomai ma tausi soifua, o ni Samalia agalelei mai malo o Niu Sila, Ausetalia, Farani ma Peretania, tatou te faafetaia ai la latou lagolago aemaise ai le fesoasaoani mai le malo o Saina, Amerika ma Amerika Samoa, o lala eseese o malo aufaatasi, atoa ai ma isi uso a malo agalelei”
Na faailoa fo’i i lea saunoaga le faailoa ai pea o fautuaga e le malolo e le gata mai le matagaluega, ae o le minisita faapea ai foi ana polokalame faasalalau, mo soo se vaega o le atunuu e oo lava i pule alii ma faipule ina ia tutu faatasi ma le malo i le taumafaiga e tafi ese le faamai o le misela.
Sa toe faailoa e le alii palemia le taua o mea nei mo le puipui mai ai o le soifua mai le maimau i tulaga ogaoga o le misela…
1. ia faia tui puipui e puipui mai ai i o’o o’oga tuga o le misela
2. ia vave ona auina atu se ua aafia i le falemai mo togafitiga
Sa ia faailoa foi ua silia i le 50,000 le aofai o tagata ua maea faia tui puipui i le taimi nei, peitai e silia lava i le 40,000 i latou e lei faia tui puipui, e pei ona galulue ai nei le matagaluega ma e fesoasaoani mai fafo.
O le mafuaaga lea ua faia ai e le malo le tonu, ina ia tapunia galuega mo le Aso Tofi ma le Aso Faraile o le vaiaso nei ( aso 5 ma le 6) ina ia agavaa tagata faigaluega e faia o latou tui puipui, sei vagana ai le vaega o loo vaaia le suavai ma le eletise.
O le a faagasolo lea tuiga tele i Upolu ma Savaii i ona alalafaga uma i aso nei e lua.
O le tatalo a le malo e tauala mai i le alii palemia ia galulue felagolagoma’i tagata uma, e lagolago galuega o loo taumafai iai le malo aua le tafi esea o le misela ma o tatou eleele.


Maina Vai

Maina Vai of Fasitoouta is a mother of five. Maina has recently graduated with a Certificate of Customary Adjudication from the National University of Samoa.
Maina Vai