Ua toe o nai aso ona tatou tuvae atu lea e faamanatuina le Aso Sa faapitoa mo tinā peitai o se Aso Tinā faanoanoa lea mo se tasi o aiga i Faleū Manono.
E 26 tausaga o se tinā ma’itaga valu masina na maua lona tino maliu i le sami.
Na faamaonia mai e le Komesina o le Matagaluega o Leoleo le tofa ia Auapaau Logoitino Filipo lea faalavelave.
Saunoa Auapaau, i uluai suesuega a le Matagaluega (preliminary findings) o si tinā lea sa alu e fagota i le gataifale mo le aoina mai o figota i le taeao o le Aso Lulu 30 Aperila 2025.
Peitai na maua lona tino maliu i le aoauli o lea lava aso e nisi o tautai mai le pitonuu o Salua i Manono ma fesootai ai loa le ofisa o leoleo i Faleolo.
Update of article Fri 9/5: Peitai e iai se tasi o le afioaga o loo faapea mai, o tamaiti na mauaina o ia, ma o atu ai loa tagata matutua aumai i luga si tinā ma’itaga.
Na faanatinati atu lea tinā i le falemai i Faleolo mo taumafaiga ia laveaina lana pepe o loo ia tauaveina.
Saunoa Auapaau e lei toe oo ane se ripoti mai le falema’i le taimi sa faatalanoa ai o ia (Aso Tofi), ae o loo faaauau pea suesuega a leoleo i le faalavelave.
Ua tuualalo mai le Matagaluega o Leoleo e tauala mai i le Komesina ia Auapaau Logoitino Filipo, ia faamuamua le saogalemu.
“O loo souā ma galu le gataifale, e ao ai lava ona faaitete ma mataala foi i faaiuga fai e fōia ai le tutupu mai o faalavelave e maimau ai soifua.”
O le tasi lenei o faalavelave o loo tulai mai pea e le o misi lava se masina o lenei tausaga ma tula’i mai – o le fano lea o soifua i le sami.
E oo mai i le taimi nei e le’i maua lava le tino o se tamā 53 tausaga o ia fo’i o se faifeau, na agai e fagota i Mulinuu.
O Pastor To’i Willy Falevalu na paka lana taavale i Mulinuu ae agai e fagota, peitai e le’i toe foi ane lava i lona aiga. I galuega saili a le ofisa o leoleo ma le galuega laveai a le FESA na maua ai mea fagota ma le ato a le tamā i Vaitele, ae oo mai i le taimi nei e le’i i maua lava lona tino.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
