E 37 tausaga o se alii sa nofo taofia i lalo o le vaavaaiga a leoleo e tālia le aso e tulai ai i luma o le Faamasinoga, sa maliu i le falemai i Motootua i le vaiaso nei.
Sa auina atu e le Matagaluega o Falepuipui i le falemai mo togafitiga, peitai ua fano lona soifua.
Saunoa le Komesina o Leoleo iā Auapaau Logoitino Filipo, “O loo faia suesuega a le Matagaluega, aemaise le tatau lea ona faia o se taotoga faapitoa e saili ai ma faamautu le mafuaaga o lona maliu.”
I se molimau a se tasi o le aufaigaluega i totonu o Tanumalala, o lē ua maliu e masani ona ia teena taumafa i nisi o taimi pe a fai taumafataga. Ae o nisi foi o taimi e laitiiti se vaega o meaai na te tagofiaina.
Na matauina foi e iai le aso sa momoli mai ai e nisi o le aufaigaluega o le falepuipui lenej taulealea, e vaai le fomai i Apia.
Ma e masalo e iai se gasegase sa aafia ai, peitai e lei mafai ona ia faailoa ni gasegase poo vaega o faalogoina i lona tino, ae na’o le vaaia lava o loo vaivai.
O le taulealea ua maliu nei, sa taofia mai o ia e leoleo i se latou osofaiga i Faleatiu, lea sa molia ma ai ni alii se toalima faatasi ai ma fualaau faasaina o le mariuana, faapea laau malosi e lei faatagaina i totonu o le atunuu.
- “O se meaalofa mo si o’u tamā ua fai’ilagi lana folauga, ma si o’u tinā sa tapua’i ma loimata” - December 1, 2023
- USD$500 ua Faasalaina ai Samoa Airways e le Malo o Amerika Samoa i le Mataupu a le Faipule Salega 1 - November 30, 2023
- Faamaonia Moliaga a se Alii sa Faigaluega i Le Ofisa o Tiute i Lona Aumaia o Fualaau Faasaina i Totonu o le Atunuu - November 30, 2023
