Maliu se Tamaititi Tolu Tausaga i se Faalavelave tau Taavale

0
3727

O le vaiaso talu ai, na maliu ai se tamaititi tolu tausaga i se faalavelave tau taavale i le lotoa o le Gym 1 i Tuanaimato.

Sa faamaonia mai e le Sui Komesina o le Matagaluega o Leoleo ma le Falepuipui, Papalii Monalisa Tiai-Keti; o le auala taavale i totonu lava o le lotoā (compound) o le fale ta’alo i Tuanaimato na tulai mai ai lenei faalavelave.

“O ī tonu lea na tupu mai ai le faalavelave ma maliu ai le ‘alu’alu toto. E le’i mafai ona tu le taavale peitai na o’o ifo le ave taavale ma lipoti atu i le ofisa leoleo i Faleata le faalavelave.”

Saunoa Papalii, “O se taamilosaga voli sa faia i le fale ta’alo i Tuanaimato, sa auai atu ai nisi o le aiga o lea tamaititi, ma o le mafuaaga tonu lea na o’o ifo o ia i lea nofoaga.”

Ua molia nei le ave taavale i le moliaga o le ave ta’avale faatamala ua mafua ai se maliu o se isi – negligent driving causing death.

E lei faamautu mai e le Sui Komesina le matua o le soifua o lē sa ia faafoeina le taavale.

I le tulai mai ai foi o lea faalavelave, ua toe tu’ualalo mai ai le Sui Komesina i mātua ma soo se tasi lava o le mamalu o le atunuu, ia tautuana le saogalemu o le fanau, ma ia faafoe ma le mataala soo se taavale i luga o le ala tele.

“Ia tausisia foi faasino ala ma faailoilo mo le saoasaoa faatulagaina, ina ia mautinoa ai le saogalemu o soo se tasi.”