Aso Tofi 18 Me 2023, Apia Samoa. E 19 tausaga o se tamaitai talavou na maliu i se faalavelave tau taavale na tulai mai i Tapatapao i le afiafi o le Aso Lulu 17 Me 2023.
Sa faamaonia mai e le Sui Komesina o le Matagaluega Leoleo ma Falepuipui, Papalii Monalisa Tiai-Keti, o le 4 i le afiafi na tulai mai ai lenei faalavelave tau taavale, ma agai atu loa iai le Ofisa o Leoleo faapea le Matagaluega o Fuimu (FESA).
Saunoa Papalii, o loo faagasolo pea suesuega a leoleo, ae o lenei faalavelave na tulai mai ina ua tifa i tua mai le alatele lenei taavale.
“O se piki apu na faafoe e se tamā mai Fusi Safotulafai ma Manono, ma le isi toatolu sa malaga mai ai i lea taavale..”
“Na auina uma atu i le falemai i Motootua le ave taavale faapea le pasese, peitai, o le tugā o manuaga i le tino ma le ulu, na maliu ai le tamaitai 19 tausaga.”
Tā’ua foi e Papalii, ua molia nei e leoleo lenei tamā i le ave taavale matautia ua mafua ai le maliu (dangerous driving causing death).
I le tula’i mai ai o lea faalavelave, ua toe tuualalo mai ai le Matagaluega o Leoleo e ui mai lea i le Sui Komesina.
“E fautuaina pea le mamalu o le atunuu, aemaise o i latou o loo tagofia foeuli o taavale, ia faafoe taavale ma le mataala, ma ia tautuana le saogalemu i luga o aualatetele.”
Sa momoli mai foi faamaisega a le Matagaluega mo matua ma aiga o lē ua maliu.
