Maliu se Tamā toafitu le fanau ina ua pa’ū mai se piki apu i Savaii

O le tamā ua maliu, o se tasi e faamoemoe iai le tausiga o le aiga aemaise si ona toalua ma le fanau. 

0
3989
File photo. Deputy Police Commissioner Auapaau Logoitino Filipo. 📷 Loreta Kelemete, SGN.

O se Eseta faanoanoa na sei mavae atu nei mo se tasi o aiga i le motu tele i Salafai, ina ua maliu faafuasei le tama o le aiga i se faalavelave e lei mafaufauina.

Na maliu lenei tamā, 40 tausaga mai le afioaga o Taga i Savaii, ina ua pa’ū o ia mai se piki apu ao tietie mai ai i tua.

Suitcases! New arrivals at SOS Available at Togafuafua and Salelologa branches.

Na faamaonia mai e le Komesina o Leoleo le afioga iā Auapaau Logoitino Filipo lenei faalavelave na maliu ai lenei tamā e toafitu si ana fanau, ao sauni atu i le Eseta.

Saunoa Auapaau, e tusa ai ma suesuega a leoleo i Savaii, o le tamā ua maliu sa tu i tua o se piki apu e taofi ni apa ato fale.

E le’i saisaia i se maea nei apa. Ae na faaifo mai loa le taavale agai i lalo o se a’ega, lelea ese loa apa ato fale mai le taavale, ma pa’ū atu ai ma le tamā.

Saunoa Auapaau na faanatinati ifo le tamā i le falemai, peitai, e le’i mafai ona faasaoina lona soifua.

Tā’ua e le Komesina ua molia le ave taavale i le moliaga o le ave taavale faatamala ua mafua ai le maliu.

O le tamā ua maliu, o se tasi e faamoemoe iai le tausiga o le aiga aemaise si ona toalua ma le fanau.