“Na ave muamua i le falema’i poo le Aso Lua, e siaki, ona toe aumai lea, ma taumafai loa e saili se fofo i tua e maua ai se fesoasoani, ae oo atu i le Aso Tofi ua tigaina. O le afiafi o le Aso Faraile na ave ai loa faamalolo i le Ekalesia lea e i gatai atu ii. E oo atu i le Aso Toanai ua tigaina lava ma ua pata le tino ma pei e papala. Na matou agai loa i le fomai tutoatasi i Vaitele ae auina loa matou e le fomai lea i le falemai. Na taunuu i le falema’i ma faia togafitiga, ae ua tuai lava, ma uma ai loa lona ola poo se mea o le 9 i le taeao o le Aso Toana’i”.
Na faailoa e le tamā ia Meki Tavita o Toamua, o lona atalii o Meki Tavita Junior, e tolu tausaga le matua, ma e lei atoa le vaiaso na ma’i ai ae maliu loa.
Na ia taua e toafa ona alo, ma o isi o ona alo ua maea ona fai a latou tui puipui, ae o le pepe ua maliu nei, e lei faia sona tui puipuia.
Sa faailoa foi e Meki, o loo iai nisi o lõ latou aiga i luma ane o le latou fale o loo maua i le faamai misela ma o loo agai uma atu ma siaki i le falema’i.
E toatolu le fanau tama, o lona atalii matua ua lima tausaga. O le lona lua ua fa tausaga ma le pepe loa lea ua maliu e tolu tausaga.
Ina ua fesiligia sa faaalia e lea tama, aiga, latou te lei silafiaina le tulaga ua faamalosia ai le faia o tui puipui i le taimi lenei, ma e ono molia matua pe afai e le tuia le fanau.
Sa taua foi o le amataga o le ma’i e leai se isi o i laua na iloa o auga ia o le faamai o le misela ina ua faatoa vaaia, ae sa tauave pea le talitonuga o mai Samoa o fanau e pei ona saili fofo ai.
“Na matou oo atu i le falemai e avatu lou atalii lea e tui, ae fai mai e le toe mafai ona tui o lea ua lavea i le faama’i”
O loo tau mafaufau Tavita poo fea na auala mai ai le faamai lea ua lavea ai lona atalii, ua ia faaalia foi o le a ave le fanau e tui, o lona atalii foi lea ua maliu toe tasi lona tui ae ona e lei atoa le tausaga.
O loo ua maea faia le tuugamau mo Meki Tavita, ae le’o iloa poo afea tonu o le a teu ai le atalii, ao se fanau i lo tatou atunuu, ua faaopoopo atu i le numera o e ua maumau le soifua ona o le faama’i o le misela.
(0)
