Maliu se alii 49 tausaga i le pō o le vaeluaga

0
2598

E 49 tausaga o se alii sitiseni Niu Sila na maliu i le po o le vaeluaga. E le o mautinoa le mafuaaga o le maliu, ae o loo masalomia na oso se ma’i a lea tama, ao fagota ma sana uo.

O le faatoa mae’a lava ona faatino mea faapāpā o le tausaga fou, ae logo ifo loa le Matagaluega o Leoleo, ina ua toe taula le vaa fagota i le uafu i Savalalo.

O le uafu i Savalalo o loo tu ai le vaa fagota a lē ua maliu. 

Saunoa le Sui Komesina o Leoleo iā Papalii Monalisa Tiai-Keti, o si alii palagi lea ua maliu, ua leva na aumau i Samoa nei, talu mai le tausaga 2011.

O lē ua maliu, o le kapeteni o le vaa, ma o ia foi e ona le vaa fagota sa tupu ai le faalavelave.

O suesuega muamua a leoleo (preliminary findings), e faapea na agai ma sana uo e fagota i le po o le vaeluaga, peitai, na toe taliu ane lea fagotaga ina ua oso se ma’i a lē ua maliu.

I suesuega muamua a leoleo, na maliu lava lenei alii ae le’i fo’i ane lo la vaa i le uafu.

Tā’ua e Papalii, o loo tālia se pepa faamaonia mai le Pule Maliu Lilo (Coroner) i se taotoga faapitoa e saili ai le mafuaaga o le maliu.

I nisi faalavelave ao alo atu Samoa mo le tausaga fou, na lipotia mai i leoleo le maliu o se alii 26 tausaga mai le afioaga o Salelologa i Savaii.

O loo masalomia na pule sia alii talavou i lona ola, ae o loo tālia fo’i se pepa faamaonia a le Pule Maliu Lilo mo se taotoga faapitoa.

E tolu maliu mai faalavelave faafuasei i le va o le Aso 23 o Tesema ma le Aso 3 o Ianuari 2024. O le tino maliu a se atalii na maua atu o upeaupe i le gataisami i Nofoalii lea e tolu iai faalavelave lipotia i le vaitau o aso fiafia.