Maliu se Alii 26 Tausaga mafua mai se Laau Malosi

"O lea lava po sa faalogoina ai le pa taalili o le fana, ae mulimuli ane faalogoina le fe'ei o le aiga ina ua tupu le faalavelave.."

0
636
File Photo: Deputy Police Commissioner Papalii Monalisa Tiai-Keti at a press conference with local media, 2023.

E 26 tausaga o se alii mai le afioaga o Paia i Savaii na maliu i le po o le Aso Toanai na mavae atu nei, ina ua faamanualia i se laau malosi.

Na faamaonia mai lea faalavelave e le Sui Komesina o le Matagaluega o Leoleo, le afioga iā Papalii Monalisa Tiai Keti.

Saunoa Papalii, o le po o le Aso Toanai 24 o Fepuari na tulai mai ai lenei faalavelave ma logoina ane ai e le aiga le ofisa o leoleo.

Ua taofia nei e leoleo le laau malosi lea sa lavea ma faamaualia ai lea alii talavou.

Saunoa Papalii, o loo faagasolo pea suesuega a leoleo i le mafuaaga o lenei faalavelave, peitai, o mua’i suesuega (preliminary findings) a le ofisa, o loo masalomia ai sa pule lea alii i lona ola, se’i tulou.

I se molimau a se tasi o le afioaga na faapea o le ma’ea o se taumafagā ava malosi sa iai lea talavou.

Ae ina ua foi ane o ia i lona fale, lea o loo masalomia na ia faatino ai le gaioiga e fa’aaoga ai le laau malosi.

O lea lava po sa faalogoina ai e lea molimau le pa taalili o le fana, ae mulimuli ane loa faalogoina le fe’ei o leo o tagata mai le fale o lea talavou.

“Sa valaau faatopetope ai loa e nisi o aiga tuaoi le fesoasoani a le taavale o le falemai faapea le ofisa o leoleo mo se fesoasoani.”

O loo taoto le tino maliu a lea alii talavou i le falemai i Tuasivi e tālia ai le fa’amae’aina o suesuega a leoleo.