Home News Local Maliu le Tamaitai sa Faataotolia i Manuaga Tuga mai se Laau Malosi...

Maliu le Tamaitai sa Faataotolia i Manuaga Tuga mai se Laau Malosi i le Faalavelave na Tulai mai Levi Saleimoa

0
2502
Motootua National Hospital. Photo: Samoa Global News.

Aso Toanai 8 Fepuari 2025, Apia Samoa. Ua iu lava ina maliu i le afiafi o le Aso Faraile 7 Fepuari se tamaitai sa faataotolia i le falemai i Motootua mai manuaga tugā mai se laau malosi.

O lenei faalavelave na tula’i mai i Levi Saleimoa i le afiafi o le Aso Lulu 5 Fepuari 2025, i le va o se alii e 36 tausaga, sa ia fanaina se tamaitai 18 tausaga, ona ia pule ai loa lea i lona ola.

Ua i leoleo se laau malosi o le ituaiga 22 rifle sa faaaogaina i lenei faalavelave matautia.

O se tasi o fomai sa galue i le vaega potu tigaina na faamaonia mai, o le lata i le itula e 10 i le po sa maliu ai le tamaitai.

Tā’ua e le tausi soifua, o le tuga o manuaga i lona ulu lea na le mafai ai ona faasaoina le soifua o lea tamaitai.

Ua faamaonia mai foi e le Matagaluega o Leoleo le afioga i le Komesina ia Auapaau Logoitino Filipo le tulaga sa oo iai lenei faalavelave.

O totonu o se taavale sa fana ai e lea alii le tamaitai, ona ia toe faaaogaina ai loa lana fana o le ituaiga 22 rifle e faaoo ai le maliu ia te ia lava (pule i lona ola se’i tulou).

O i laua ua maliliu nei, o loo masalomia e iai lo la sootaga vavalalata (intimate partner relationship) peitai, o le tamaitai ua maliu, o se tasi e faamautu i Niu Sila ae o loo asiasi mai i Samoa nei.

O le taulealea ua maliu nei o se tasi e le tau fesiligia lona sao i le mafutaga faaleaumaga i Levi Saleimoa.

O le vaaiga mulimuli ia te ia o le Aso Lua o lenei vaiaso na auai atu ai i Mulinuu e tapuaia le faamasinoga a le afioaga ia Laaulialemalietoa Leauatea Polataivao Schmidt.

E le o mailoa i le taimi nei poo afea o le a faia ai toe sauniga o i la’ua ua maliliu.

Faasalalauga Tāua 

 

LEAVE A REPLY

Please enter your comment!
Please enter your name here