Maliu le Pailate o se Vaalele na Pa’ū i le Sami i gatai o Vaitele

0
1347

Ua maua le tino maliu o le pailate o le faalavelave lea na pa’ū ai se vaalele i le sami i le aoauli o le Aso Gafua 27 Me 2024.

O se vaalele le ituaiga o le Ultralight Land Sea Craft, e na o le toatasi le tagata e mafai ona malaga ai, na pa’ū i le sami i gatai ane o Vaitele.

Na faamaonia mai e se tasi o le aufaigaluega a le vaega lavea’i o le fesoasoani muamua o le FESA (Fire and Emergency Services, le maliu ai o le pailate sa faafoeina le vaalele.

Ua faamaoniaina fo’i, o le pailate e ona le vaalele o lē sa galue muamua mo le kamupani vaalele a le atunuu, le sususga ia Phil Meredith.

Tā’ua e le molimau, pe tusa o le te’a o le itula e tolu i le aoauli o le Aso Gafua na latou aga’i ai i le vaega o le ogasami i Vaitele ma faatino ai le galuega lavea’i.

“O le vaega tonu lea o loo eli ai le oneone a le kamupani o le Blue Bird Lumber & Hardware..”

E pei ona faatalanoa e le Radio Polynesia le afioga iā Lemalu Nynette Sass, i ona taimi ao galue i le Pulega o Malae Vaalele i le faatunutonuina o vaalele (tower control), sa galue ai fo’i lē ua maliu mo le Polenisia.

“Tusa o le 1980, na ia toe foi mai ai i Samoa ma galue ai i le malae vaalele. O le vaitaimi lena sa avea ai Mr Phil Meredith ma pailate i le Polenisia, mo ni nai tausaga.”