Maliliu se Toafa sa Galulue i Galuega Faavaitimi i se Faalavelave Tau Taavale i Ausetalia

0
7589

O se tapuaiga faanoanoa ma le faamoimoi loto i aiga ma uo i Samoa nei, o i latou na maliliu mai se faalavelave tau taavale i Ausetalia.

O se tala faanoanoa ma faamoimoi loto i tapuaiga a aiga ma uo i Samoa nei, ona o le maliliu faafuasei ai o nisi o alo o le atunuu o loo toesea mo sailiga manuia i galuega faavaitaimi i Ausetalia.

Na taumafai atu mo se faamatalaga mai le matagaluega o loo gafa ma le faapolokalameina o galuega faavaitaimi, le MCIL, peitai na faailoa e se tasi o lea ofisa, ua na o le ofisa sili, le Susuga ia Pulotu Lyndon Chu Ling, ma le Minisita, le Afioga ia Leatinuu Wayne Sooialo, e mafai ona talanoa i le media.

Ae na taua e se tasi o le aufaigaluega, “E tusa ai ma le faamatalaga le soo upu le matagaluega i totonu o Ausetalia, o le po o le Aso Toonai, le faaiuga o le vaiaso, na agai ai talavou nei e tafafao i se tasi nofoaga o loo faamautu ai nisi foi o alo o Samoa na malaga atu foi i galuega faavaitaimi. O le toe foi ane i le nofoaga o loo faamautu ai na tulai mai ai le faalavelave, ma o loo masalomia sa faasua’ava uma i latou nei.”

O i latou nei ua maliliu nei, na latou tuua Samoa i le masina o Iulai o le tausaga nei, ma le faamoemoe e iva (9) masina le konekarate. E faamoemoe e toe taliu mai ia Aperila o le tausaga fou.

E 25 tausaga se alii mai Letogo, 27 tausaga le tasi mai Falefa, 28 tausaga o le tasi mai Lufilufi ma le 34 tausaga mai le afioaga o Lefagaoalii ma Safotu, e fai le toalua ma le fanau. O feutagaiga o le Matagaluega ma kamupani sa galulue ai latou nei mo nisi to tulaga.

Ua faailoa e le Sui o le Ofisa ua silia ma le toasefulu alo ma fanau o le atunuu ua fano soifua a o iai i galuega faavaitimi.