E 68 tausaga le soifua o se tina mai le afioaga o Vaitoomuli, Palauli na faamaonia mai e le Matāgaluega o Leoleo; na malemo ma maliu ai i le amataga o le vaiaso nei.
Saunoa le Komesina o le Matāgaluega o Leleo ma Falepuipui, le afioga ia Auapaau Logoitino Filipo, na agai lea tina matua ma nisi tina se toalua e fagota i le tuitui, peitai, o le sua mai o le tai lea na tulai mai ai loa lenei faalavelave.
O suesuega a leoleo e faapea na taumafai le tasi o tina e laveai mai lē ua maliu ina ua sua tutu’i mai le tai, peitai, e le’i mafai ona faasaoina le soifua o le tinā matua.
O le tulai mai o lea faalavelave ua tuualalo mai ai le Matāgaluega e tau ala mai i le Komesina, ia tautuana le saogalemu ao agai atu le mamalu o le atunuu e fagota.
“O nai o tatou matua o loo agaga lava i latou i taumafa sa taumamafa mai ai i aso ia, peitai, e tatau i fanau ona mata’itu lelei le saogalemu o tina ma nai o tatou tamā matutua.”
O le isi itu tāua e ao ona nofo malamalama iai le mamalu o le atunuu, o le faateteleina o aafiaga o le gatai sami i suiga o le tau o loo tulai mai.
“O loo siisii pea le maualuga e oo atu iai le sami pe a oo ina sua mai le tai; o nisi ia o aafiaga o suiga o le tau o loo tulai mai ma lipotia pea mai i faamaumauga a vaai tau.”
