Malemo i le Aso Kerisimasi se Taulealea 20 Tausaga i Togitogiga

0
2658

O se kerisimasi faanoanoa ua feagai nei ma se aiga mai Malie ina ua maliu se latou tamaitiiti 20 tausaga le matua, ina ua malemo i le afu o Togitogiga i Saleilua  Falealili.

Sa tupu le faalavelave ina ua le toe fo’i a’e i luga lea alii mai tuugaoso i le afu i Togitogiga, lea e lauiloa tele mo taelega, ma tafaoga a aiga i aso fiafia; ma o le tasi lea o fiafiaga o tagata i lea mataaga a le atunuu – o tuugaoso i le afu lea.

O i tonu e fai mai ai tuugaoso a e asiasi atu iTogitogiga. Ata: Faalauiloa a le Saletoga Sands.

O se tasi o molimau sa iai i le afu i le taimi tonu na tupu ai le faalavelave na ia faailoa o le va o le afa o le tolu 3:30pm, ma le fā i le afiafi 4:00pm o le Aso Faraile o le Kerisimasi, na tupu ai le faalavelave.

O le alii o Kiei Vaiti Tala, 20 tausaga le matua mai Saleilua, sa iai ma lona uso laitiiti i le taimi tonu o le faalavelave.

Ata: Kiei Vaiti Tala mai Saleilua.

Sa ia faailoa i le Samoa Global News, sa latou vaaia le malosi o le aave o le tafe o le vai.

“O le taimi tonu lava lenā na pa ai le vai, ae o atu ai loa e taeele o loo matua malosi lava le tafe o le vai.. lea la sa tupu ai loa ma le faalavelave isi uso..”

Na faailoa e lenei taulealea o Saleilua, o latou ma isi talavou o lo latou nuu, ua leva na taeele ma fai a latou tuugaoso i le vai, ae ina ua vaaia loa le malosi o le tafe o le vai, faamuta loa tuugaoso.

Na taua foi e Kiei, sa oo ane lava le tamaita’i o loo vaaia le afu ma lapataia tagata ina ia aua nei toe tuuoso ona ua malosi le tafe o le vai, peita’i, na te le’i iloaina pe sa iai i lea taimi le aiga mai Malie.

“O le taimi ae le’i pa mai le vai sa toatele taelega. Sa matou iai ma tau fai fepuga uma a tamaiti.. ae o le taimi tonu sa oo atu ai si vaega lea, ua pa le vai..

“Sa alu atu le fafine e vaaia le vai ma lapatai tagata, ae ou te le iloa la pe sa iloa pe lagona mai e i latou le lapataiga.”

Na tā’ua e Kiei sa fesoasoani uma lava latou i taumafaiga e saili poo fea le tama, ao lei taunuu atu le FESA ma leoleo.

“Ina ua lē maua lava si uso, sa faigata tele i le vaai atu i si aiga, ua fetagisi ma lauē i luga o le vai”.

“Feel sorry for his family..😥💔we did our best to save him but we couldn’t make it. Rest in peace uso Perez 😥”.

Aiga ma nisi sa taumafai e sue le tama ina ua tupu le faalavelave. Ata: Kiei Vaiti Tala mai Saleilua.

Sa faailoa mai e le Alii Komesina o Leoleo ia Su’a Fuiavailili Egon Keil, na oo atu se feosasoani a leoleo faapea ma le fuimu, ina ua le maua le tama e i latou sa iai i lea taimi.

Na ia faaalia fo’i, sa mulimuli ane maua le tino maliu o lenei atalii ina ua oo atu se tasi e iai le tomai faapitoa i le maulu (professional diver).

Saunoa mai Su’a Fuiavailiili, e fai lava sina umi o se taimi o taumafai pea le professional driver e sue le atalii ma iu ai lava ima maua, ua malemo o ia.

Na faailoa e le Alii Komesina o loo faaauau pea a latou suesuega.

“E le’i maea a matou su’esu’ega peitai e foliga mai o se faalavelave faafuasei, e le’i mafaufauina. Ma e foliga mai e leai lava se tulaga fa’asolitulafono o maua ai.

“O loo taumafai lava e tilotilo i tulaga uma.., pe o le mea ua malosi tele le tafe, ia pe o se tulaga tau soifua maloloina na mafua ai lenei faalavelave.”