MALELEGA A LE AFIOGA I LE AO MAMALU O LE MALO – TUIMALEALIIFANOVAALETO’A SUALAUVI II
MAOTA O LE AO MAMALU O LE MALO – MATAMATANONOFO, FALELATAI
Tutoatasi o Samoa, 1 Iuni 2021
Lau Afioga i le Taitai o le Sauniga, Afioga Akiepikopo Alapati Lui Mataeliga,
Lau Afioga i le Sui o le Fono a Sui Tofia,
Lau Afioga i le Alii Palemia ma lau Kapeneta o le Malo Tausi,
Lau Afioga i le Faamasino Sili ma Alii ma Tamaitai o le Faamasinoga,
Lau Afioga i le Fofoga Fetalai Tausi,
Members of the Diplomatic Corps – Sui o Malo mai Fafo,
Faauluululuga o Matagaluega ma Faalapotopotoga a le Malo,
Le Paia o le Aufaigaluega Totofi a le Atua,
Le tapuaiga a Samoa mai ona ao seia oo i ona iu, o lo’o maimoa ma faafofoga mai i maota ma laoa, ma soo se tafa o le lalolagi. O le paia lava lea auā Aiga ma a latou Tama, o Tama foi ma Aiga, Tumua ma Pule, Ituau ma Alataua, Aiga i le Tai ma le Vaa o Fonoti.
Ou te faapai atu foi i le faafofoga tapuai mai a le faigamalo a Tutuila ma Manu’a. I le afio o le Afioga i le Kovana Sili ma lau faigamalo. O le paia aua le Pulega Faatonu, Le Faamasino Sili ma le Ofisa o Faamasinoga, Le Fofoga Fetalai ma le Peresetene, ma Sui Mamalu o Maota e lua o le Fono Aoao Faitulafono a Amerika Samoa. O paia lava ia auā Sua ma le Vaifanua, Fofo ma Aitulagi, Ituau ma Alataua, Saole ma le Launiu na Saelua. Afifio o Faatuiolemotu, Alalatai tootoo o le Faleula ma Upu i le Manuatele.
Ae lilifa la tatou faasifoga i le Atua e aofai iai paia o le lagi, o ia o lē Pule Aoao, o ia o le Sapenapāeanea o loo faavae ai lo tatou Malo Tutoatasi. O ia e ona le alofa tunoa ma le filemu o loo lago malū ai pea la tatou folauga Samoa e ui ina tele fita ma luitau o le soifuaga.
Ua maleifua mai lo tatou atunuu i lenei taeao fou, o le aso faailogaina o lo tatou Malo Tutoatasi, aua o le aso na muai sisi ae ai ma agiagia le tagavai o le Malo Tutoatasi o Samoa; ua avea ai ma alii o aiga i atumotu tutoatasi i le vasa Pasefika. Ua tatou aulia ai i le pule faasoifua a le Atua, le limasefulu ma le iva tausaga o le tatou Malo Tutoatasi o Samoa. Ia tatou viia ai pea le Atua o le Lagi ma le Lalolagi, aua o Ia o le Atua le Tama, le Alo ma le Agaga Paia, o le Atua o Isaraelu, o le Atua o Aperaamo, ma Isaako ma Iakopo, o le Atua lea o loo faavae ai lo tatou Malo Tutoatasi, pei ona faamauina i le Faavae o lo tatou Malo.
Samoa e, e le mavae le agaga faafetai i le Atua. E sufi pea lona alofa ma lana tausiga malu i si o tatou atunuu, ma o tatou faapea ane ai – ana le seanoa oe le Atua, e le mafai e Samoa ona folau mai i nei tausaga e tele, ma ausia atuvasa fitā ma souă o le soifuaga.
Ou te faafetaia ai taitai uma o Ekalesia Kerisiano i Samoa ma le aufaigaluega totofi a le Atua. O loo outou toele pea i le Atua i aso uma, ina ia tumau Ona aao alofa i luga o Samoa. E faapea foi ona ou faafetai i lo tatou atunuu atoa i lau tou tatalo ma le tūtū faapuluvaga i luma o le Nofoalii o le alofa tunoa, ina ia maua pea le manuia ma le to’a filemu i lo tatou atunuu. Aua e leai so tatou poto, ma so tatou malosi ma so tatou manuia pe a aunoa ma le Atua. O loo tatou molimauina ai galuega ma atinae lelei o loo faatino ma taumafai pea iai lo tatou Malo, ma Kamupani, o aufaipisinisi ma aufaifaatoaga, faapea faalapotopotoga eseese, aua le atinaeina ma le siitia o le tamaoaiga o si o tatou atunuu ma aiga; faamalo le galulue, faafetai le ta’i. O lou tou gapatia ma lou tou aao masui i le tautuaina o si o tatou atunuu, o loo silafia e le Atua mea uma.
Ou te faafetai atu foi i le pulega mamalu a Alii ma Faipule, i le saofaiga a matai, o augafaapae ma sa’oao, o faletua ma tausi, faapea le malosi o nuu; o loo outou liolio i le mamalu o Nuu ma Afioaga, ma outou lagolagosua i le Malo e le gata i ana atinae, a o le malupuipuia o o tatou nuu ma aiga, ma le manuia auiluma o Samoa. Faamalo le taufalemau, faafetai le pule, ma le taofiofi iumaea alalo, ina ia nofo lelei ma nofo fealofani o tatou Nuu ma Afioaga.
E le faagaloina le sao taua o a tatou pa’aga mai fafo, o atunuu ma Faalapotoptoga o loo o tatou galulue faatasi i le atinaeina o le tamaoaiga o Samoa. O le faaauau pea o nei faiga paaga mautu i le tele o tausaga talu mai le uluai faigamalo o le Malo Tutoatasi o Samoa i le 1962, o le faailoga vaaia lea o le mausali o taiala, ma pulega lelei o loo tiu ai si o tatou atunuu i le va i fafo.
Tatou ave ai pea le viiga i lo tatou Atua.
O loo tatou iai pea i tulaga maaleale ma le faaauauina o puipuiga ona o le faamai o le Koviti 19 ua aafia ai le lalolagi atoa. Faafetai i lo tatou Atua Faafofoga Tatalo, o loo tali mai ia tatou talotaloga ma anapogi ina ia malupuipuia pea si o tatou atunuu mai lenei faamai faigata ua fano ai le toatele o tagata o le lalolagi. Ou te maitau, ua silia ma le tausaga atoa o galulue le aufaigaluega a le tatou Malo i le po ma le ao e faatino galuega uma mo le puipuiga o le atunuu mai lenei siama. Faafetai le tautua matavela, ma lo outou alolofa ia Samoa. O upu tautino a lo tatou Alii Faaola o lesu – pe na o sina ipuvai malulu e te ofoina atu mo se uso, e lẽ maumau lau auaunaga, e faamanuia le Atua ia te oe. O le mea lea, ia outou lototetele pea e faatino lo outou valaauina, e laveai ai le atunuu mai le faamai o pepesi nei. Ou te faafetai foi i le tatou Malo ua maua le tui puipui mo le mamalu o le atunuu, tau lava ina tatou faaaoga lea fesoasoani ua tatou maua, aua e sili le puipuia i lo le tau togafitia.
E i ai aso e taugalemu ai, ma aso e lē taugalemu ai foi; o aso o le tai tafola, ma aso e susu’e fuefue ai le tai. O uiga masani lava ia o lo tatou soifuaga. Ae afai e tumau pea lo tatou faatuatuaga i le Atua, ma tatou sulufai pea ia te Ia i le tatalo ma le anapogi, tatou te mafanafana i lalo o le paolo o ona aao alofa, i soo se ituaso e tofotofoina ai la tatou savaliga.
Le mamalu e o le tatou atunuu, i Taitai ma Auauna totofi o Ekalesia Kerisiano uma, le Pule mamalu a Alii ma Faipule i afioaga taitasi, faapea Vaega e Tolu o Itu Fefaatauagai o le Malo, ma a outou matagaluega ma faalapotopotoga ae tainane o Taitai ma Sui Mamalu o Vaega Faaupufai o le HRPP ma le FAST, ma le aoao tetele o le tatou atunuu atoa, e na o le Atua lava tatou te maua ai le filemu i lenei vaitau o fesouaiga ma feeseeseaiga i upufai o malo. Pe tatou te fefulituaai ma fefaamasinoai, e leai lava se maopoopoga poo se manuia tatou te maua ai.
Ou te tatalo atu ai i le agaga maulalo, aumai le filemu o le Atua tatou te fefaamagaloai ai ma tatou folau faatasi ai, ina ia faaauau pea ona tatou sisi le fu’a o le manumalo o Iesu Keriso, o Ia e maua ai le filemu ma le faamaoni o upufai o malo. O Ia na te totofi o tatou Taitai. O Ia tatou te tuu i ai le tatou faamoemoega ia manuia le malo o Samoa nei ma ielua. O Ia tatou te mafaia ai ona lepeti i lalo olo uma a le tiapolo, o loo taumafai ia fevaevaeai lo tatou atunuu ma faatoilalo i le laufetõa’i. O la’u tu’ualalo Samoa le atunu’u pele, aua nei solofa pe mavae lo tatou faatuatuaga i le Atua. Tatou saili pea i le Atua, tatou faatali pea i le Atua, tatou faanono manu pea i le Atua ia taitai ma faatonu folau la tatou savaliga i le faasinoga a lona Agaga Paia.
Fai mai Afioga Paia a le Atua:
“Afai e faamaulalo lo’u nuu e ua ta’ua i lo’u igoa, ma latou tatalo, ma sailiili ia te a’u, ma liliu ese i o latou ala leaga, ona ou faalogo ai lea mai le lagi ma faamagalo ia latou agasala, ma faaolaina lo latou nuu.” (II Nofoaiga Tupu 7:14)
“O le mea lea ia faamaulalo ai tatou i lalo o le aao malosi o le Atua, ina ia faamaualugaina outou e Ia i ona po e tatau ai.” (II Peteru 16)
Fetalai Iesu,
“O la’u poloaiga lenei, ia outou fealofani, pei ona ou alofa atu ia te outou.” (Ioane 15:12).
Samoa e, avea le faamanatuina o le 59 tausaga o lo tatou Malo Tutoatasi i le aso, tatou te toe manatua faatasi ai o tatou tuaa, ma la latou galuega fita, na tapena ai le Malo ua tatou aeae ai nei. A ia faasilisili ai la tatou faafetai ma le viiga i le Atua, aua o Lana Pule Tutasi ma lona alofa tunoa na maua ai lo tatou saolotoga.
Ia manuia le faamanatuina o le 59 tausaga o le Malo Tutoatasi o Samoa.
SOIFUA MA IA MANUIA
