Ua loa nei le tele o vaiaso o loo toso pea le mataupu a Malele Paulo ma Lema’i Sione, talu ona faamaonia e le Faamasinoga o la moliaga o le taupulepule lea e faaoo le oti i lē sa avea ma Palemia, faapea lē sa avea ma Komesina o Leoleo o Samoa.
I lenei foi la vaiaso na toe valaau ai foi le mataupu, ma toe talosaga ai foi Malele Paulo poo King Faipopo i luma o le Faamasinoga Maualuga mo se isi avanoa se tasi e faamautu mai ai sana loia mai fafo, “ona e leai se loia i Samoa nei e fia tula’i mo ia.”
Saunoa Malele Paulo e faailoa i le Faamasinoga, o loo faia i le taimi nei feutanaiga ma se loia mai fafo. I le taumafaiga o sana loia mai fafo – o loo iai foi se suegatupe poo se Go Fund Me page o loo talosagaina ai le mamalu o le atunuu mo se fesoasoani e totogi ai se loia mo Malele Paulo.
Ina ua fesiligia e le afioga i le Faamasino ia Fepuleai Ameperosa Roma pe sa ia faatumuina ni pepa i le Ofisa o le Resitara mo se loia e totogi e le Malo (legal aid), peitai, sa tali Malele Paulo, e leai.
“Na toe fesili Justice Fepuleai pe aisea?”
Ae na tali King Faipopo, “ona e leai se loia e fia tulai mo a’u.”
Ua tuuina atu nei e Fepuleai le vaiaso e tasi e saili ai se loia, ma o le avanoa mulimuli foi lea.
A leai, o le a faatulaga loa e le faamasinoga le aso e fofogaina ai le faaiuga poo le faasalaga e ono tuuina mai.
O le valaauina o lenei mataupu talu ai na talosaga ai Malele Paulo mo se masina se tasi, e saili ai Sana loia aemaise o le faia o se sailiga tupe, (Go Fund Me) e totogi ai se loia.
O lenei mataupu o loo tuli ai le faasalaga a se tasi ua faamaonia e le Faamasinoga, ma latou taupulepule faatasi e faaoo le oti ia Tuilaepa Sailele Malielegaoi faapea foi Fuiavalili Sua Eagon Keil.
E 4 tausaga le faasalaga na tuuina mai e le tamaitai Faamasino ia Justice Tafaoimalo Tologata Leilani Tuala-Warren mo Taualai Leiloa o Laulii ma Magiagi.
Sa talia e Taualai Leiloa ona moliaga ma ia molimau ai – o ia sa lafo mai iai tupe, ma tuuina mai iai se aupega e faatino ai le latou taupulega. Sa ia molimau fo’i – o i latou sa taupulepule – e aofia ai Malele Paulo, Lema’i Sione, ma Talalelei Pauga sa ia lafoina mai tupe mai Ausetalia.
O le ma’ea ai ona faamaonia e le vasega o Faatonu moliaga, na faaalia ai e Lemai Sione e tauala atu i lana loia ia Unasa Iuni Sapolu – o loo ia apili i le faaiuga a le Faamasinoga. Peitai o le alii loia na tulai mo Malele Paulo o Quentin Sauaga, na ia faaleao i luma o le Faamasinoga, ua sauni Malele Paulo mo se faasalaga (sentencing) e tuuina mai.
O lea lava aso sa tulai ai Malele Paulo i luma o le Faamasinoga ma ia talosagaina, ua fia sui sana loia, ona ua ia le talitonuina lana loia.
Ua toe tolopo ai nei lea mataupu i le Aso Gafua o le vaiaso fou, ma faatonuina e le Faamasinoga Malele Paulo – e tatau ona oo atu iai ua maua se loia e tulai mo ia.
