Malaga mai le Palemia o Niu Sila mo le Faailogaina o le 60 Tausaga o le Faigauo i le Va o Malo e Lua

0
370

Ua faalauiloa mai e le taitai o le malo le malaga mai o le palemia o Niu Sila, Rt Hon Jacinda Ardern.

Saunoa le palemia o Samoa le afioga ia Fiame Naomi Mataafa, e malaga mai le palemia o Niu Sila i le aso 1 Aokuso, o le aso tonu lea e famanatu ai le sainigalima o le faigauo i le va atunuu e lua (Treaty of Friendship).

“O le aoauli o le aso Faraile e toai taunuu ai le tamaitai palemia ma lana aumalaga, o nisi o minisita o lana foi faigamalo poo lana kapeneta..”

“E le o se malaga umi, o le faamoemoe, o le faamanatuina lea o le 60 tausaga o le faigauo i le va o Malo e lua.”

O le a tomua i se ava o le feiloaiga e faia lea i Vailima, ona sosoo ai lea ma se tali a le Malo i se taumafataga.

A ma’ea ona feiloai atu lea o le au malaga i le Ao o le Malo,  sosoo ai lea o le Guard of Honour ma sisia ai tagavai o Malo e lua.

Sosoo ai ma se feiloaiga a le aumalaga ma le kapeneta, ona o loo malaga mai ai nisi o Minisita o le Malo o Niu Sila.

E iai foi ma se feiloaiga a le tamaitai Palemia ma sui o le au fai pisinisi, faapea le Samoa Business Hub o loo faatupeina e le Malo o Niu Sila.

“A ma’ea ona tatala atu lea o le avanoa i le au faasalalau, ona faamavae atu lea i le au malaga ma toe taliu atu ai le tamaitai Palemia mo Niu Sila,”

Saunoa Fiame, “O le taunuu mai o lea au malaga, o se avanoa lelei lea e faatalanoa ai nisi o vaega mo le manuia lautele o le atunuu, aemaise o le saga faamautu lea o faigauo i le va o Malo e lua.”