Mafatia se Tamā i Faiga Taufaasese mo Galuega Faavaitaimi

0
2040

E 39 tausaga o se tamā mai le afioaga o Leauvaa, e suafa ia Emelio Toalua, na ia faasoa mai i le tulaga mafatia ma le maasiasi o loo feagai nei ma ia.

Tā’ua e Emelio o se tamaitai pe a ma le 30 i le 45 tausaga lona matua sa ia taufaaseseina ia ma nisi foi o le latou nuu.

O lenei tamaitai sa ia faaogaina le igoa o se tasi o le au faigaluega a le Matagaluega o le Malo o loo gafa ma galuega faavaitimi (MCIL – Matagaluega o Pisinisi, Alamanuia ma le Leipa).

“Na fesootai mai ma faailoa mai o ia e faigaluega i le vaega tonu o loo tapena ai galuega faavaitaimi (MCIL)..

“Sa ia faapea mai o lona igoa o Lynn Nauer. E galue o ia i le fogafale 5 o le fale o le ACP i le mea tonu o loo iai le ofisa o le MCIL.”

O le faamatalaga a lenei tamaitai, o loo ia galue i le tuufaatasiga o se aumalaga o loo moomia Niu Sila, ma o loo faagasolo i le taimi nei.

“Sa ou faatalanoaina loa le avanoa ma nisi o uso ona o le naunautaiga lava ia maua avanoa e saili seleni ai auā le tausiga o aiga ma fanau”.

Tā’ua e Emelio, sa amata loa ona faagaioi vaega uma e moomia. O le tala a lea tamaitai sa latou fesootai, afai o loo iai sau tusi folau, e totogi le $250 tala e faagaioi ai e Lynn pepa uma, faapea ma le avanoa i le vaalele. “Ae afai e lei faia sou tusi folau, e $500 tala le seleni e ave i le mafine lea e tapena ai vaega uma..”

Sa faailoa e Emelio, e toa sefulu latou mai le latou nuu, na ave le tai $250 tala aua o loo iai a lafo, ao nisi ua ave le tai $500 ma le faanaunauga lava e fia malaga atu mo galuega faavaitaimi.

Ta’ua e Emelio, sa logoina mai i latou e Lyn, e sauni loa, o le Aso Tofi 22 Setema latou te malaga ai mo Niu Sila.

“Peitai na matou taunuu i Faleolo ae toe text mai ua le oo ona matou malaga ae o le Aso Sa, aso 25 e faataunuuina ai le matou malaga.

Sa toe o foi i le malae vaalele i le Aso Sa. “Sa matou oo atu foi i le malae vaalele, e lē o iai ni a matou igoa i le lisi”.

Na taumafai e fesootai Lynn, peitai, ua le maua se fesootaiga ae ua tapē foi le telefoni.

Tā’ua e Emelio, “O le Aso Gafua na matou oo atu ai i le ofisa o le Matagaluega o Pisinisi Alamanuia ma le Leipa (MCIL) e saili le taimaitai ofisa..

“O i lea sa matou iloa ai, e ese foliga o le tamaitai ofisa e suafa ia Lynn, ese foliga o le tamaitai lea ua ia faa’aogaina le igoa Lynn Nauer e taufaavalea ai matou”.

Faailoa e Emelio, na fautuaina latou e le Matagaluega, e agai i le ofisa o leoleo e faailoa iai le tamaitai taufaavalea.

“O le Aso Lua o le vaiaso nei na matou feiloai ai loa ma Lynn i le ofisa o leoleo. Sa tuuina mai ai matou tusi folau ae ua leai se seleni.”

Saunoa Emelio, “Sa fautuaina e leoleo le tamaitai lea ina ia totogi mai matou tupe. Afai e leai, e tatau ona faaulu se matou tagi e faasaga i lenei tamaitai.”

Sa vave maua e leoleo lenei tamaitai sa lipotia atu ma toe faafoi uma tusi folau a e sa aafia.

“Sa tagi ma faatoese.. ma fai mai e tuu atu se lua vaiaso e toe maua mai ai matou tupe sa tuuina atu ia te ia..”

Tā’ua e Emelio, “E lagona le mā, ona na fai matou faamavaega ma matou aiga, matou uo, matou ekalesia ma le mafutaga a le autalavou.. ae emo ifo le ata e taufaasese ma tau faavalea lenei tamaitai.”

Ua tele ni lapataiga a le Matagaluega a le MCIL o loo gafa ma galuega faavaitimi ua tuuina mai i le mamalu o le atunuu, e uiga i lenei lava mataupu.

Pei ona silafia, o loo tuli nei i le falepuipui faasalaga o ni alii se toalua, ina ua faamaonia moliaga o le taufaasese i nisi o tagata mo galuega faavaitaimi. Sa la aoina ni seleni e tai $300 tala mai le toa 13 o e sa aafia.

O Tesema 2021 sa tuuina mai ai le faasalaga falepuipui mo Viliamu Faaleleiga ma Joseph Lafaele, mo le tai 4 tausaga mo le moliaga lava lea o le taufaasese ma le tau faavalea.