Ua mae’a se iloiloga i le tulaga o le totogi amata mo tagata faigaluega a Samoa

I lea iloiloga sa mafuli ai le Tafatolu, e ao ona siitia i le $5 tala i le itula le totogi amata.

0
1010

Ua faailoa e le Ofisa Sili o le Matagaluega o Alamanuia ma Leipa, le afioga iā Pulotu Lyndon Chu Ling, le ma’ea ai lea ona tapena se iloiloga i le tulaga o le totogi maualalo (minimum wage) lea ei le $3 i le itula, ma o loo talia ai nei se finagalo o le Kapeneta.

O lea iloiloga sa faatino mai le amataga o lenei tausaga e le Tafatolu (Tripartite) e nafa ma le totogi maualalo.

O lenei Tafatolu e galulue faatasi ai le Vasega o Tagatafaigaluega (Workers), ma ē ana galuega (Employers) faapea ma le Malo.

I lea iloiloga sa mafuli ai le Tafatolu, e ao ona siitia mai le $3 tala i le itula o loo iai nei, i le $5 tala i le itula le totogi amata.

Sa pāsia ai fo’i, e ao ona ta’i lua tausaga ma iloilo le tulaga o iai le gasologa o le totogi amata ma le tulaga o taoto ai tupe maua a ē ana galuega poo le aufaipisinisi.

“E lē pito tasi le vaai a le Matagaluega e le gata o le totogi amata mo tagata faigaluega ae o loo tilotilo fo’i i le itu a le aufaipisinisi.

“E fua fo’i se siitaga i le au faipisinisi ma a latou tupe maua, aua o i inā lea e maua ai galuega a tagata.”

Tā’ua e Pulotu, ua ma’ea se sailiiliga sa faatino i faamaumauga a le Matagaluega o Fuainumera Faamauina (Samoa Bureau of Statics) ma iloilo ai le mataupu mai le itu tau i le tamaoaiga faapea le tau o le soifuaga (economic and cost ot living analysis).

I suesuega a le Matagaluega, o loo faamauina ai o le tausaga 2020 sa faatino ai le siitaga mulimuli lea e iai nei le $3 i le itula.

O se faamatalaga mai fo’i i le Faalapotopotoga Tumaoti o Au Faipisinisi le Samoa Chamber of Commerce – e le o toe toatele ni pisinisi o loo latou faaaogaina le $3 tala i le itula. O le $5 tala lava le totogi pito maualalo lea ua tele ina faaaoga.

O le tala faasolopito o le totogi maualalo poo le minimum wage i Samoa – sa umi se taimi o i le $2 i le itula i le vaitau a’o iai le kamupani o le Yazaki Samoa i totonu o le atunuu.

E silia ma le lua afe tagatanuu o Samoa (lea sa toatele i tinā) sa faafaigaluegaina e le Yazaki, ma totogi i le totogi maualalo, ae ese mai ai mea taumafa ma le momoliina o le aufaigaluega (plus meals and transport).

O loo tālia nei la se finagalo o le Kapeneta i le ma’ea ai ona iloiloina le siitaga o totogi amata.

Faasalalauga Tāua