E lua ni mataupu o loo taooto ai ni tino maliu i le falemaliu i Motootua e tālia ai ni taotoga faapitoa (post mortem) e saili ma faamautinoa ai le mafuaga o le maliu (cause of death).
Saunoa le Sui Komesina o Leoleo, afioga Papalii Monalisa Tiai-Keti, o nei mataupu e lua, o loo moomia ai i le faagasologa o suesuega a leoleo le faamautu o mafuaaga na maluliu ai.
O le mataupu muamua, o se tamā matua mai le afioaga o Afega sa maliu i le faaiuga o le masina o Me. I suesuega a leoleo, e faapea ua atoa le vaiaso e lē o toe vaaia e ona tau aiga ma ona aiga tuaoi lenei tamā.
Ae ina ua saili atu i lona fale, sa maua ai o loo taoto mai, ua maliu. O lenei tama matua e i uta lona fale, ae na o ia foi, ona sa toesea le tina i le aiga ma lana fanau i atunuu mamao.
I se faamatalaga a nisi i le afioaga, sa ta’ua ai o le faletua o lenei tama e na te faia fofo Samoa, e masani ona tumutumu atu iai le mamalu o le atunuu, ae o si tama lava lea e alu e sue mai vai o fofo.
O le tina o le aiga na malaga atu i Niu Sila i le tausaga ua mavae ma ua fai si umi o loo toesea.
O le isi o mataupu na saunoa iai le Sui Komesina, o se tama 31 tausaga mai le afioaga o Vaoala lea na lipotia mai, sa sauni mo le agai atu e faigaluega i le taeao, ae na faafuasei ona vaaia e lona aiga le pa’u (collapse) ma maliu ai lava.
I le faasologa la o suesuega a leoleo i nei mataupu e lua, e tatau ona faatino ni taotoga faapitoa, ma tālia ai le toe agai mai o le fomai faapitoa mai Fiti lea e masani ona faataunuuina nei taotoga mo Samoa.
O loo taofia tino maliu e lua i le falemaliu i Motootua e talia ai se taimi e mafai ai ona faatino nei sailiiliga, ona faatoa mafai ai lea e aiga ona aveesea atu tino maliu mo toe sauniga.
Faasilasilaga
