Lua Itumalo Savaii sa Apalai Sui Faipule, ae lē Taliaina e le Komiti

E toalua Itumalo mai le Motu Tele i Salafai ua faailoa mai, sa tu’uina atu a lā’ua tusi talosaga mo le tofi Taitaifono mo Fono Faavae a lā itumalo, peita’i, ua faate’ia i la’ua ina ua lipotia mai e le afioga i le Palemia, e le’i iai ni tusi apalai mai Sui Faipule o a lā Itumalo.

Sa faalauiloa e le Taitai o le Atunuu le Susuga i le Laaulialemalietoa Leuatea Polataivao Fosi Schmidt i lana feiloaiga ma tusitala i le Aso Lulu, 14 Ianuari, ua faailoa atu e le lipoti a le komiti sa faatalanoaina tusi apalai (Recruitment & Selection committee) e toafā itumalo e le’i tuuina atu ni tusi talosaga a latou Sui Faipule mo tofiga faata’ita’ifono.

“Ua fa’amaonia e le kapeneta e toafā faipule mai i itumalo e 4 e le’i aumaia ni tusi apalai e ala i le fa’atinoina o interviews mo le filifiliga o ta’ita’ifono o itumalo.

1. O le itumalo o Lepa e le’i apalai le latou faipule
2. O le itumalo o Faleata 3 e le’i apalai le latou faipule
3. O le itumalo o Falealupo e le’i apalai foi le latou faipule
4. O le itumalo o Faasaleleaga 2 e le’i apalai foi le latou faipule

Peita’i ua saunoa Sui Faipule o Falealupo ma Faasaleleaga 2, sa tuuina atu tusi apalai, ma sa aloaia fo’i tusi vala’aulia ai le oo atu mo interview.

O fa’amaoniga o finagalo o Sui Faipule mai Savaii iā A’eau ma Va’aelua, o loo maua leaai i tusi vala’aulia a le Matagaluega o Tina ma Tama’ita’i Atina’e o Nuu na Agafeso’ota’i.

O le Aso 1 o Tesema 2025 sa tusia ai le tusi valaaulia a Aeau, ae o le Aso 2 o Tesema 2025 le tusi valaaulia a Vaaelua.

Falealupo

Saunoa le afioga i le Sui Faipule o Falealupo le afioga i le Loia iā A’eau Tima Le’avaise’eta, e na te te’ena le mau, e le’i iai sana tusi talosaga.

“Sa iai la’u tusi talosaga, ma o le mafuaaga fo’i lea na fa’ateia ai a’u ina ua agiga i le saunoaga a le afioga i le Palemia na fa’apea mai, o Falealupo le isi itumalo e le’i iai se tusi talosaga..

“Ou te lē faitio la i le afioga i le Palemia, ona sa manino i lana saunoaga, o le lipoti a le komiti sa faia fa’atalanoaga.”

Saunoa A’eau o le lipoti a le komiti faapitoa e ono fesiligia ai e lona itumalo le latou Sui Faipule – pe aisea ua lē tuuina atu ai se tusi talosaga mo le tofiga Taitaifono o le Fonofaavae.

“O le ā fa’apea mai e leai se tusi talosaga a lo’u nei sui, e lē moni, ma e tu’umaualaloina ai lo’u nei tagata, ma fa’apea ai le matou itumalo, poo fea o lo’o o’u tafao ai ae lē faia se talosaga i lea tofiga tāua.”

I se faatalanoaga ma le TV1 Samoa, sa faitau manino mai ai e le Sui Faipule le tusi na tu’uina atu e le Matagaluega, e faafetai mai ai mo le tusi talosaga sa avatu, ae maise o le latou taliaina ma valaaulia ai loa o ia, mo faatalanoaga.

Peitai; e pei ona faasoa mai ai le afioga ia Aeau, ina ua ia oo atu i le faatalanoaga, e ese le tulaga na o’o iai.

Ua faapea atu le Taitaifono le afioga ia Ulualofaiga Talamaivao Fonoti Perelini, e leai se interview e faia.

“Ua fai mai, o le tusi sa ou tuuina atu o se tusi tete’e ae le o se tusi talosaga..”

Saunoa A’eau, o le Tusi Talosaga sa ia tuuina atu, sa momoli ai ma atugaluga e tusa ai ma le process, lea ua toe tau apalai atu ai i latou nei o Sui Faipule, ae ua mae’a le filifiliga a le atunuu, ma tusilima le Itumalo ia i latou.

“E le o se tete’e atu i le Poloketi, leai. Ae sa tuuina atu ma le agaga maualalo, se faanoanoaga, ona o le process lea ua toe tau apalai atu ai i matou nei o Sui Faipule, ae lē tuu sa’o le Taitaifono i le Sui Faipule o le Itumalo, e tusa ai ma le fa’avae o lo’o taatia i le taimi nei.”

Saunoa A’eau, o le isi itu sa faanoanoa ai tele, o tuuaiga sa faia e le Taitaifono, ma upu sa lafo atu ia te ia.

“Ua to’atama’i lava le Taitaifono ma tu’uai mai, o a’u lea sa tusia le tusi lea ua ia faaigoaina o le Tusi Tetee a le HRPP..

“Sa ou tu’ualalo iai ma le agaga faaaloalo, e leai. O au o le Sui Faipule, ae lē o a’u o se Loia a le vaega faaupufai..

“O lo’o iai loia a le vaega faaupufai e fautuaina mataupu faapenei, ae lē o le Faipule o Falealupo e pei ona tu’uaia ai lo’u nei tagata ma lafo mai upu lē talafeagai i lena aso.”

Saunoa le Sui Faipule o Falealupo, sa fesoasoani atu loa Tagaloa Eddie Wilson i le mataupu, ma faapea atu, atonu o le a mafai ona toe maua se isi avanoa latou te talanoa ai.

O le aso lava lea ua mae’a le feiloaiga ma le Komiti, Aso 5 Tesema 2026, sa toe alu ane ai loa Aeau i lona ofisa, ma toe tā se isi tusi talosaga ma toe momoli ane i le ofisa poo le Matagaluega o Tina ma Tama’ita’i Atina’e o Afio’aga ma Aga Feso’ota’i.

I le naunauta’iga lava a le Sui Faipule o Falealupo i le lelei o le Fonofaavae a lona itumali, sa ia tāina ai fo’i ma se tusi faatoese i le Komiti e ma momoli faatasi ane ai.

“E ui ina o lea ou te iloa o le tusi apalai sa ave muamua, lea na tuuina mai ai le tusi valaaulia mo le faatalanoaga, ae ua ou taumafai lava e ūia le auala maualalo..

“Sa ou fo’i ane i le Ofisa ma loimata maligi, toe tusi le isi tusi talosaga, tusa lea la ua lua ai, tuu faatasi iai ma se tusi faatoese, ma momoli ai lava i lea aso..

Saunoa Aeau, sa malaga i Ausetalia i le Aso 9 o Tesema e pei ona iai sana faagoi ua mae’a ona sainia e le Afioga i le Fofoga Fetalai, mo se faalavelave tau aiga.

Sa fiu e toe tālia se isi fesootai atu a le Ofisa poo le Komiti.

“Ou te talanoa mai lava i lo’u Ofisa i aso uma, ae fai mai, e tasi lava le taimi na fesootai atu ai le tagata fesili, ta’u atu ua ou malaga i Niu Sila, ma e le’i toe fesootai atu lava se isi..

“Ae sa ma fetaui ma Tagaloa saunoa mai, se manū sa mafai ona fai se matou faatalanoaga i le zoom. Ia na gata ai lava iina e le’i toe fesootai atu.”

Faasaleleaga 2

Ua tē’ena fo’i e le Sui Faipule o Faasaleleaga 2, le afioga ia Va’aelua Senetenari Samau, le saunoaga a le Palemia, e na te le’i talosaga.

Na lipotia fo’i e le TV1 se faatalanoaga ma le Sui Faipule o Fa’asaleleaga 2.

Saunoa le Sui Faipule, le afioga ia Va’aelua Senetenari Samau, o le Aso 10 o Tesema i le itula e 1:01 i le aoauli sa talosagaina ai lona auai atu e fa’atautaia se faatalanoaga ma le Komiti, j le Jetover Hotel i Savai’i.

Fa’ailoa e Va’aelua i le TV1 Samoa, ua fa’ateia fo’i ia, ina ua agiga atu ai ma lona igoa ae maise o le itumalo o Faasaleleaga 2, i le lisi a le afioga i le Palemia, mo i latou e le’i talosaga.

I le saunoaga a le Susuga i le La’aulialemalietoa na ia fa’amanino ai fo’i nisi o vaega na fa’ailoa atu e le Komiti Fa’afoe na fa’atautaia fa’atalanoaga mo tofiga fa’ata’ita’ifono.

“I le lipoti ua tu’u mai e le komiti fa’apitoa sa faia iloiloga ma fa’aiuga, o lo’o fa’ailoa mai ai, e iai nisi o i latou na apalai mai o faipule, e iai nisi faipule e le’i apalai, e iai fo’i nisi faipule na apalai ae na tete’e i le poloketi..”

“O i latou ia na fai iai le fa’aiuga a le vaega fa’aupufai ma le komiti fa’apitoa, e le auai i latou i le filifiliga o taitaifono o komiti o fonofaavae.

“Sa avatu le tusi a i latou e fa’ailoa ai lo latou tete’e i le poloketi, toe tete’e i faiga fa’avae fou lea ua fa’ata’atia, ma o le mafuaaga lea na fai ai le fa’aiuga.”

Peitai, ua saunoa Sui Faipule mai Savaii iā A’eau ma Va’aelua, e le’i iai lava se agaga e tete’e atu i le poloketi, ae ua na o le faanoanoaga, i le tau toe apalai o Sui Faipule filifilia ua mae’a ona tusilima iai a latou Itumalo.

Sa fa’amanino fo’i e A’eau le agaga o le tusi lea sa latou tu’uina atu.

“E le’i iai lava se vaega i totonu o le matou tusi o lo’o fa’apea atu ai, e matou te tete’e i le poloketi o le fonofa’avae…

“E fa’apefea ona matou tete’e, o le auga lea o faigamea..

“Pau a le vaega o loo matou tā’ua i le tusi, ina ia silasila ane pe aisea ua fa’apea ai, ae o lo’o manino lava le ta’iala a le Matagaluega District Development Operating Manual, o lo’o tuuina mai ai, o le Sui Faipule lava e Ta’ita’ifono.”

Faasilasilaga Tāua