Lua itu tāua o le molimau a Lealailepule na tuuina atu i luma o le Faamasinoga

"Ua oo fo'i lava i la'u fanau, ua folafola le fasioti o a'u ma la'u fanau.."

June 26, 2025

1663

E lua lava itu tāua sa faailoa i le molimau a le afioga i le Sui Faipule ia Lealailepule Rimoni Aiafi ina ua tulai i luma o le faamasinoga e tali atu i tuuaiga a Samuelu Su’a o loo faapea mai ai, o Leala sa faafoeina se taavale landcruiser lea na lavea ai le talavou ia Tuuau Faasavalu Maletino i le vaveao o le Aso 21 Aperila 2021.

Muamua, e pei ona molimau ai le Failautusi a le HRPP, o le po o le Aso Lua 20 Aperila 2021 agai atu i le vaveao o le Aso Lulu 21 Aperila lea sa tulai mai ai lenei faalavelave, sa auai atu ai Lealailepule i le camp a lana vaega faaupufai sa faia i le maota o Petesa i Mulinuu.

I le faasologa fo’i o molimau na tulai ai fo’i le Pule Sili o le Frankie ia Pitovao May Cai, e faapea o ia sa i atunuu i fafo i le põ o le faalavelave. O le afioga ia Pitovao lea sa tuuaia e Samuelu, sa ia vaaia fo’i i lea po, na o atu faatasi ma Lealailepule i le landcruiser.

Lona lua e tusa ai ma le molimau a Lealailepule, e le’i iai sana taavale landcruiser e tusa ma tuuaiga a Samuelu, lea sa faapea mai ai o le landcruiser paepae e tosi mumu, sa faafoeina e Lealailepule i lea po.

O se landcruiser lanu uliuli a Lealailepule sa iai, na lavea i lona atalii ia Aukuso o le tausaga 2019, ma aveese atu ai e le Progressive Insurance, ae tuuina atu le tupe (write-off claim).

Lipoti a le Samoa Obsever ina ua lavea le taavale a le alii Minisita Lagolago i le 2019.

Na tulai i luma o le faamasinoga faaitumalo i le Aso Gafua le tofā ia Lealailepule e folasia lana molimau tuu fofoga i le mataupu o le hit n run lea ua alu nei le 4 tausaga o tuuaia ai pea o ia i luga o upega tafailagi.

Sa faatuputupula’ia tuuaiga faasaga ia Lealailepule, ina ua tuuina atu i luga o le polokalame Tautai Ae o le blueTV, ni folafolaga a Samuelu Su’a.

E 4 suafa eseese o loo faamauina mo Sam. O Samuelu Piki. O Sam Leau. O Fauega Leau. O Fauena Leautuli Toese Sua.

Saunoa Leala i lana molimau, “E leai se isi tagata i Samoa e pei o a’u, o loo naunau e suesue le mataupu lea na maliu ai Tuuau..”

O le mafuaaga, ona ua tele tusitusiga; o komeni mātuia, o faasalalauga i luga o le social media, ua tuuaia ai o ia.

“Ua faaleaga ai lo’u tagata; ma aafia ai lo’u itumalo, o la’u vaega faaupufai, o la’u ekalesia, ae maise o lo’u aiga ma la’u fanau..”

Molimau Lealailepule, ua tele upu lalafo atu, o ia e fasioti tagata; ma ua aafia ai le saogalemu o ia ae maise o lana fanau, ona o loo iai foi aiga o si talavou na aafia, ma ua lalafo upu faamata’u ona ua latou talitonuina lava tuuaiga na fai e Samuelu i lana interview i luga o le blueTV.

“Ua oo fo’i lava i la’u fanau, ua folafola le fasioti o a’u ma la’u fanau..”

Sa toe faatepa le faamasinoga i ata poo video o folafolaga a Samuelu lea sa tuuina mai i luga o upega tafailagi i le tausaga 2023. E le gata i le hit-and-run, ae faapea fo’i ma se tuuaiga ogaoga, sa tuuina atu se tupe e $300 tala – e tagatavaleina ai Laaulialemalietoa faapea Olo Fiti Vaai.

Na fesiligia e le tamaitai loia ia Kathryn Dalziel o loo tulai mo Samuelu ma Sivai, le mau a Samuelu o loo faapea mai ai, o Lealailepule sa ia faafoeina le landcruiser siliva i le po na tupu ai le faalavelave ia Tuuau.

Peitai na tali Lealailepule, “O le po lea e tā’ua na tupu ai le faalavelave, sa ou iai i le matou camp a le HRPP i Petesa, ma ou te le’i alu ese lava ma Petesa i lenā po, ma e leai foi sa’u landcruiser..”

Molimau Lealailepule, “Na oo atu lava leoleo, o Junior Vaalotu ma isi leoleo ma suesue a’u; ma sā faamaonia mai ai lava sa ou iai i le matou camp i le po atoa.”

Na fesiligia e Kathryn Dalziel o fea la o iai faamaumauga o lau mau lea e te talanoa mai ai sa oo atu leoleo ma faatalanoa oe i Petesa ona e le o iai se faamaumauga i luma o le faamasinoga. Ae na tali Leala i le tamaitai loia; o lea e tuuina atu lana ia molimau ma le faamaoni, “ae alu oe e fesili i leoleo poo fea o iai faamaumauga.”

Na tā’ua e Lealailepule i lana molmau, “Sa iai la’u landcruiser, ae o le 2019 na lavea ai i lo’u atalii ma aveese ai loa, ae faatoa tupu le faalavelave i le 2021.”

Sa molimau Lealailepule o le kamupani insure o le Progressive Insurance sa aveesea le taavale ae tuuina atu le tupe (write-off claim).

Na fesiligia foi e Kathryn Dalziel, o le mau a Samuelu na alu atu i lou fale, ma sa lua talanoai ai i le faalavelave lea na tupu, peitai, na tali Leala; e toatele tagata e agai atu i lona fale ona o ia o le Sui Faipule o le Itumalo. E oo fo’i i le taeao o le faamasinoga, na oo atu ai foi nisi ae le’i alu ese mai i lona fale le sui faipule.

**Samoa is the Home of TAULA. Enjoy responsibly.**

Molimau Leala, na te tau manatua i se mea o Iulai 2023, na alu atu ai le tagata lea ma fai atu ia te ia, e fia talanoa i le faalavelave lea na maliu ai le tama aoga..

“Na ou tago tuli ese ma ou fai iai, e alu la e ta’u i leoleo, ae aua nei e toe sau i lo’u fale.. na fai mai i se pasese. Ou te le’i avea iai se pasese.”

O loo teena malosi foi e le Sui Faipule, e na te le’i tuuina atu se tupe ma se fana ia Samuelu, ma se folafolaga e faaoo le oti ia Laauli ma Olo.

Molimau Lealailepule o latou ma Laaulialemalietoa ma Olo na latou oo atu i totonu o le Palemene i le tausaga lava e tasi ma e mafana lo latou mafutaga e fafo atu o le polokiki. Na maliu le tuaā o Lealailepule na sii atu iai Olo. O faamanatuina fo’i o aso soifua e faapena fo’i ona fetausia’i.

Tā’ua e Lealailepule, o suesuega a leoleo, na faapea mai ai le Komesina ia Auapaau Logoitino Filipo, “O loo kilia ma māmā lo’u igoa i tuuaiga na fai e Samuelu, ma o le mafuaga lenā o le faaulu ai o la’u tagi e faasaga i le mataupu o loo suesueina nei, ona ua ta’uleagaina lou tamaliiaga..”

**Head to Lynn’s Supermarket for these fresh Nutella delights.**

O faamaumauga mai suesuega a leoleo na tui fesili ai e loia a itu tetee Lealailepule, ae sa tali lava le Sui Faipule, o loo tuuina atu lana ia molimau ma le famaoni. Ae ō latou (loia e aofia ai ma loia mai fafo) e fesili i leoleo mo latou faamaumauga. E leai se mea e fesiligia ai fua ia.

Ina ua fesiligia e le alii loia ia Richard Marchant le Sui Faipule, sa lauina ai e le loia le molimau pepelo o Lealailepule. Peitai, na tali Lealailepule i le loia mai Niu Sila, e ave ana upu ma toe tuu i ona fofoga. “Put your words back into your own mouth.”

Sa taofi le faamasinoga, ae tuuina atu sina taimi i le loia mo leoleo ia Leinafo Taimalelagi Strickland, e talanoa ai i lana molimau.

Ua maea nei le 5 vaiaso o iloilo lenei mataupu i luma o le Faamasino Sinia o le Faamasinoga Faaitumalo ia Talasa Atoa-Saaga, o loo tuuaia ai le afioga ia Laaulialemalietoa Leauatea Polataivao Schmidt, Fepuleai Faimata Sua, Li’o Faataumalama Auava, Lise Marie Schmidt, Samuelu Leau Su’a ma Sivai Kepi.

Na maea molimau a leoleo i le Aso Lulu, ma maea ai loa ma iloiloga a le Faamasinoga ina ua folafolaina, e leai se isi o è o loo molia, e tulai mo se molimau.