Loimata o le Fiafia ua Tafi Esea ai Lagona o le Tigaina

0
2269

O le tamaitai ia Sui Tauasosi ua sili aoao i le Vasega 13 i le Kolosi o Maluafou mo le tausaga 13 – Year 13 dux.

O loimata o le fiafia i le tulai mai o le afafine e sili aoao, ua tafi esea ai lagona o le tigaina ona o le faigata o le soifuaga ma faafitauli o lenei tausaga.

O lagona ia o le tamā ia Filoimalo Tauasosi, e 49 tausaga mai Falevao ina ua fesiligia sona finagalo i le tulaga maualuga na oo iai taumafaiga a lona afafifine ia Sui.

Ta’ua e Filoimalo e le faigofie le sailiga o le seleni mo le faatupeina o le aoga a le afafine. O ia e faigaluega i le KL Security ma e le gafatia e lona totogi le faatupeina o manaoga o le aiga.

O le tamaitai ia Sui e 17 ona tausaga, e lona 7 o ia i le faasologa o le fanau a Filoimalo ma le tina o Fuapine. O mea uma tau tupe ae maise le faaaogaina o le fanau, e galue toatasi lava e le tamā o le aiga ona o le tinā e gafa o ia ma le tausiga o le aiga i tulaga uma o le fale, ma le tausiga o le fanau (homemaker).

O le mafuaaga lea e galueina ai foi e le tamā ia Filoimalo nisi o atinae e mafai ona maua ai se seleni faaopopo mo le faaaogaina o le fanau.

“E finau lava, e le gata o le galuega tumaoti, ae o ma’umaga, ma tufi le popo e maua ai seleni mo pili aoga ae maise o le faatupeina o aso taitasi..”

“Peitai, o lenei aso e pei e fofoe atu se lagona tigaina ina ua manuia taumafaiga a le afifine; e faafoi ai pea le viiga ma le faafetai i Le Atua”.

E fā mataupu sa sili ai le dux o le 2021 ma mataupu foi nei e fiafia ai tele Sui. O le Computer Studies, Religion Knowledge, Economics ma le Accounting.

O le Accounting e faapito iai lona naunau ma e fia oo atu i se tulaga maualuga lona fia suesue i le Accounting ma avea ai o ia ma se Suetusi poo se Tausitusi foi.

Ou te matua faafetaia ou matua ona o le lagolagoina o au ma lau aoga i nei tausaga se tele,”

Saunoa mai Sui, e ui lava ina lima vaivai si ona aiga, ae sa finau pea na ona mātua.

“La te lei faavaivai, ae na saili lava ma finau mo le faatupeina o la’u aoga”.

Na ia ta’ua foi o le a faa’auau i le Iunivesete Aoao o Samoa, pe afai ae manuia mai le faaiuga o suega ua mavae atu nei.

“Ona saili ai lea o sa’u galuega e tausi ai o’u matua, ae o la’u miti, o le fia avea lea o a’u ma se Suetusi.