LIPOTI MAI LE OFISA O FA’ALAVELAVE TUTUPU FA’AFUASEI
(OFISA O LE SO’OUPU)- E o’o mai i le 9:00 i le taeao nei, Aso Faraile 28 Ianuari 2022, ua fa’amaonia mai e le Matāgaluega o le Soifua Mālōlōina o lo’o tumau pea i le 27 i latou o lo’o a’afia i le Koviti – 19.
O lo’o fa’anofoesea pea i latou nei i le nofoaga fa’apitoa mo puipuiga masani, ma le mata’itūina fa’alesoifua mālōlōina. E leai se isi o i latou nei o iloa ai āuga ma tulaga tugā o le Koviti – 19 e pei o le tale, fiva, pepē o tino, fa’afaufau ma lē lagona se fia taumafa.
O lo’o fa’aauau, mapo ma tumau puipuiga masani a le Matāgaluega o le Soifua Mālōlōina ma le Ofisa o Fa’alavelave Tutupu Fa’afuase’i, mo le mata’itūina pea o i latou nei, aemaise fo’i i latou uma o lo’o fa’anofo va’ava’aia i nofoaga fa’apitoa ua fa’atulagaina.
O lo’o faaauau pea i le La’asaga 3 (Level 3) (lanu mūmū) mo Poloa’iga o Fa’alavelave Tutupu Fa’afuase’i le tapunia ai o le atunu’u atoa, mo le puipuiga lautele o Samoa mai lenei fa’ama’i.
O le fa’amanatu, ia tautuanā fa’aaogā tali fofoga i taimi uma ma usitā’ia fautuaga o lo’o tu’uina atu mo le saogālēmū o tagata uma.
Mo nisi faamatalaga faafesootai mai le Ofisa o Fa’alavelave Tutupu Fa’afuasei i le numera 32759 poo le numera 8006440 ma le numera 911 mo se fesoasoani manaomia.
(4)
