Leai se suiga o le tau o le suāu’u mo Iulai 2024

Mo le Penisini, e $3.46 i le lita o lo’o fa’atauina ai, o le Tiso e $3.46 i le lita, a’o le Karasini e $3.05 i le lita.

0
39

Tusia: Pesetā Tusiga Taofiga

O lo’o fa’aauau pea le tau tuai o le suāu’u iā Iuni 2024 mo lenei masina fou ua amatalia o Iulai 2024.

O le fa’amaoniga mai le afioga i le Minisitā o le Matāgaluega o Tupe iā Lautimuia Afoa Uelese Va’ai, na ia fa’ailoa ai, e leai se suiga o le tau o le ā fa’atauina ai le penisini, tiso ma le karasini mo le mamalu tele o le atunu’u i lenei masina fou.

Ma o lo’o tumau ai pea le tau tuai sa i ai iā Iuni 2024.

Mo le Penisini, e $3.46 i le lita o lo’o fa’atauina ai, o le Tiso e $3.46 i le lita, a’o le Karasini e $3.05 i le lita.

Fa’ailoa e le Minisitā, pe a fa’atusatusa le tau o le suāu’u i Samoa ma isi atunu’u tuāoi e i ai Fiti, Ausetalia ma Niu Sila, ona ta’oto ai lea o le fa’atusatusaga ua i ai nei.

Mo Samoa i le Penisini ma le Tiso e $3.46, a’o Ausetalia, e $1.80 Ausetalia i le Penisini tusa lea ma le $3.21 Samoa, a’o le Tiso e $1.87 Ausetalia tusa lea ma le $3.34 Samoa.

Mo Fiti, e $3.08 Fiti i le Penisini ae a fa’aliliuina e $3.77 Samoa ma le Tiso e $2.63 Fiti ae $3.22 Samoa pe a fa’aliliuina. Ma le tau o le suāu’u i Niu Sila, e $2.68 Niu Sila i le Penisini ae a fa’aliliuina e $4.39 Samoa a’o le Tiso e $2.05 Niu Sila ae $3.36 Samoa pe a fa’aliliuina.

Ata Pu’eina: Savali Newspaper


Tusiga Taofiga