Leai se Suiga i le Taimi e Tufa ai Tului Masani a le NPF

0
400

E lē o iai se fuafuaga a le NPF e faasafua vave atu i tua le tului faaletausaga a le aufaisaofaga lea s tufaina i tausaga taitasi.

O le saunoaga lea a le alii pule sili o le NPF ia Pauli Prince Shuren, ina ua fesiligia i le taeao nei e le Samoa Global News.

“E faasafua lava le meaalofa a le NPF i tausaga uma. Ae o loo faagasolo pea le tausaga faaletupe nei ma e le mafai ona iloa i lenei taimi pe fia se aofaiga – pau lava le mea mautinoa…e fai lava e le misia.”

Ae o le masani ai, o le kivi (dividend) poo le tului a le aufaisaofaga e maua i le masina o Iulai i tausaga taitasi, e fua lea mai le polofiti a le NPF mai le tausaga ua tea.

Faataitaiga, o le tului e maua ia Iulai 2020, o se pasene o le polofiti mo le tausaga faaletupe 30 Iuni 2019.

Sa fesiligia le taimi e tufaina ai le tului lo lenei tausaga ona o loo faatalitali le toatele o le aufaisaofaga i se faamanuiaga aua le tulaga o loo iai nei le tamaoaiga o Samoa faapea le lalolagi atoa i le aafiaga o le coronavirus.

Sa tuu atu foi e le Faalapotopotoga a le Aufaipisinisi Tumaoti le Chamber of Commerce se talosaga e faasafua se afa o lea faamanuiaga i le taimi nei, ona tufa lea o le afa totoe ia Iulai.

Peitai o Iea ua saunoa Pauli, e leai se suiga ma e tālia pea Iulai.

O le tausaga ua mavae lea foi na tuuina mai ai se vaega o lea fesoasoani ina ua mafatia le atunuu i le misela. Ae na faailoa e le Alii Palemia i lana foi taimi…”E le’i lapo’a lea meaalofa, masalo pe toe lua pe tolu fo’i ni masina ona talafeagai lea.”


Maina Vai