Leai Se Sui o le Malo e Talia Saunoaga o le Savali O Le Filemu

0
1262

E le’i mafai ona agai ane se sui o le Malo e tali se saunoaga o le faamoemoe o le Savali O Le Filemu a le faalapotopoga o le Samoans For Ceasefire, e pei ona masani ai le tele o faamoemoe e savalia i luma o le Maota o le Malo.

O le taeao o le Aso Lulu na savalia ai se vaega o tama, tina ma fanau iti. O i latou sa faatinoina se sainigalima (petition) i luga o fesootaiga tele vavave (online) e famuta ai le taua, pe taofia ai foi osofaiga Isaraelu e faasaga ia Palesitina.

O le faamoemoe o le solo, ia lagolago mai le Malo i taumafaiga e faamuta ai le taua o faia nei  sasao tutonu.

Na faailoa e se tasi o tina na auai i le tapenaga, “E lua vaiaso ae lei oo i le faamoemoe, na tuuina atu ai se tusi i le Malo o Samoa, e faailoa atu ai le faamoemoe. Peitai, na toe taape sui auai o le solo, e aunoa ma se sui o le Malo na afio ane.”

O le solo na molimauina ai le auai o nisi o tamaitai loia o lo tatou atunuu, o Muriel Lui faapea ma Maposua Tanya Toailoa.

Saunoa Maposua, “Ua oo mai lava le faanoanoa. O le matou savali ua leva ona faailoa i le tatou Malo. Sa momoli lava le tusi aloaia e invite ai se Sui o le Malo e momoli aloaia iai matou sainigalima. O lenei foi petition, ua na o se auala e faaleo ai lagona.”

“O le auala sa tatau ona uia e le Malo, e afio mai se Sui o le Kapeneta poo le Malo. Na o na omai lava e momoli atu ai le feau, aua e leai se isi e faia tonu o tatou Malo. O lea ua avatu lava le faatuatuaga ia i latou e taitaia le tatou atunuu, e faia ai e latou le faaiuga tatau.”

“Na faapea e tali mai le Malo i se auala fiafia ma se auala faatemokalasi. Ia o le a saili se isi auala e faoo ai le matou feau.”

O le masina o Oketopa talua ai nei, lea na faatino ai le afioga tamaitai palemia, Fiame Naomi Mataafa, i le fonotaga a le United Nations General Assembly, lea na faamauina ai, e le’i palota Samoa i le palota e taofia ai osofaiga Isaraelu i Gaza.

E lata i le 20,000 le aofai o soifua ua fano i le taua o loo faia nei. Ua faamauina 6387 tamaiti ua maliliu, ae 4257 tina ua maliliu i lea taua.